भांगरभूंय | प्रतिनिधी
मडगांव, प्रतिनिधी ः कोंकण रेल्वे मार्गाचेर तिकेट तपासपाची मोहीम सतत चालू आसता. ऑक्टोबर ते डिसेंबर 2023 ह्या तीन म्हयन्यांच्या काळांत फुकट प्रवास करपी प्रवाशां कडल्यान 5 कोटी 60 लाख 99 हजार 17 रुपयांचो दंड वसूल केला.
रेल्वेंतल्यान तिकीट नासतना प्रवास करपी लोकांचेर दंडाची कारवाय जाता. कोंकण रेल्वे मार्गाचेर ऑगस्ट ते ऑक्टोबर 2023 ह्या तीन म्हयन्यांत वट्ट 14,150 अनधिकृत आनी अनियमीत प्रवासी तिकेट नाशिल्ले मेळ्ळे आनी तांकां दंड भरचो पडलो. हातूंतल्यान वट्ट 86 लाख 37 हजार 820 रुपया दंड वसूल केलो. हातूंत 23 ऑगस्ट मेरेन तिकेट नाशिल्ल्या 4484 प्रवाशां कडल्यान 26 लाख 67 हजार 555 रुपया दंड वसूल केलो. 23 सप्टेंबर मेरेन तिकेट नाशिल्ल्या 4888 प्रवाशां कडल्यान 27 लाख 9 हजार 700 दंड वसूल केलो. 23 ऑक्टोबर मेरेन 4778 प्रकरणा नोंद जाली आनी 32 लाख 60 हजार 565 रुपया दंड वसूल केलो.
नोव्हेंबरांत ही मोहीम चड खर करून 7013 जाणांचेर कारवाय करून 2 कोटी 5 लाख 52 हजार 445 रुपया दंड वसूल केलो. डिसेंबर म्हयन्यांतय 6,675 फुकट प्रवाशांचेर कारवाय करून 1 कोटी 95 लाख 64 हजार 926 रुपया दंड वसूल केलो. ऑक्टोबर ते डिसेंबर मेरेन तिकीट नाशिल्ल्या 18,466 प्रवाशां कडल्यान 5 कोटी 60 लाख 99 हजार 17 कोटी दंड वसूल केलो. सरासरी दरेका फुकट प्रवाशा कडल्यान 3037 रुपया दंड वसूल केला.
असुविधा टाळपा खातीर प्रवाशांनी योग्य आनी वैध तिकेटी घेवन प्रवास करचो असो उलो कोंकण रेल्वे प्रशासनान मारलां. फुडल्या काळांत तिकेट तपासपाची मोहीम चड खर करतले अशेंय सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
