राजकारण्यांनी न्हय, म्हादय वाचोवपाक आमी सगल्यांनी एकठांय येवचें पडटलें : प्रसाद गावडे

भांगरभूंय | प्रतिनिधी

सध्या कितलेंय मेळ्ळ्यार समाधान  जायना… आमी सोंपे तरेन पयशे जोडून आळशी जाले जाल्यार ताचो त्रास सैमाक जातलोच. लोकां मदीं पयशे जोडपाची हाव तयार जाली जाल्यार सैमाक त्रास जातलो.

आयतारची मुलाखत

सोशल मिडियाचो फायदो पर्यावरण राखपा खातीर करप, आनी हे चळवळींत आनीकय समविचारी तरणाट्यांक जोडपाचो मोलादीक वावर मूळ गोंयकार (कोरगांवचो) आनी आतां सावंतवाडींत रावपी प्रसाद गावडे करता. ताका सोशल मिडियाचेर ‘कोंकणी रानमाणूस’ म्हूण वळखतात. ह्या रानमाणसान आमचें सैम, शेती, रानां, कुळागरां आनी गांवपण राखपा खातीर जी चळवळ उबारल्या ती कितलेशेच लोक उखलून धरपाक लागल्यात. 

स्वता इलेक्ट्रिकल अभियंतो आशिल्लो प्रसाद खबरांपत्रां वयले अग्रलेख वाचून, तातूंतलीं वैचारीक मतां सोदून काडटा आनी तीं आत्मसात करता. पर्यावरणाक त्रास करपी गजालींक तो विरोध करता आनी गांव राखता. ताच्या ‘मांगरां’त जे रावपाक येतात तांकां तो उमेदीन जगपाचे विचारूय दिता. आसा तातूंत समाधान मेळोवप अशें तो म्हणटा. प्रसादाचे हे चळवळी विशीं चैत्रा बोरकार हांणी खोलायेन विचारलें तेन्ना तो सांगता:- 

तुमची ही संकल्पना सारकी कितें? म्हणल्यार तूं लोकांक कितें दाखोवंक वा पटोवंक सोदता? 

: आमी हांगां ‘वॉलिंटीयरींग’ पर्यटन सुरू करपाचो यत्न केला. ह्या माध्यमांतल्यान तांकां गांवचे लोक कशे जगतात तें दाखयतात. जो कोण हांगां येतात तांकां आमी पिझ्झा आनी बर्गर खावयनात. तर गांवचे लोक मौसमा प्रमाणें जें अन्न खातात तेंच तांकां दितात. हें जेवण सामकें पारंपारीक आसता. ते येवन आमच्या वांगडा आमची जीण जगचे आनी आमी जें काम करतात तें तांणीय करचें अशी आमची अपेक्षा. हें मजा मारपाचें पर्यटन नक्कीच न्हय. जेन्ना पर्यटक आमच्या शेतकाऱ्यां वांगडा आनी नुस्तेकारां वांगडा काम करतात, तेन्ना तांकांय एक उमेद मेळटा. ही खोस एक वेगळीच आसता. 

तूं सावंतवाडीच्यान वेंगुर्ला आनी झोळंबे दोडामार्ग हांगां कसो पावलो? 

: फाटलीं तीन वर्सां संशोधन करीत आसतना हांव अशे शेतकार सोदतालों जे शेतीचेर आपलें पोट भरतात आनी आपलो उदारनिर्वाह चलयतात. अशें सोदता सोदता म्हाका कांय जाण ह्या सुवातांनी मेळ्ळे आनी हांवें तांच्या वांगडा रावून म्हजी संकल्पना मुखार व्हरपाचो यत्न केलो. ह्या लोकां कडल्यान म्हाका एक सकारात्मक उर्जा मेळटा. ते पयशां खातीर जगनात. ते लोक स्वता खातीर जगतात. 

तुमी सोशल मिडियाचेर रील्स घालतात आनी ते वरवीं तुमी खुबूच फामाद जाल्यात. ताचो कितलो फायदो तुमची संकल्पना मुखार व्हरपा खातीर जाल्या?

: ह्या मळार काम करूंक इत्सूक आशिल्ले कांय लोक आमकां जुळत गेले. आमी जेन्ना सैम राखण करपा विशीं कार्यशाळा आयोजीत केल्यो तेन्ना सोशल मिडियाचो लाव जालो. खूब लोकांनी आमकां ह्या माध्यमांतल्यान संपर्क सादून कार्यावळींत वांटो घेतलो. मुंबय, पुणें आनी बंगळुरू सावन लेगीत लोक  आमचे कडेन आयले. 

तुमच्या ‘मांगर’ हे संकल्पने विशीं सांगशात? आनी ते खंय खंय आसात?

: मांगर (फार्म स्टे) हीं मातयेचीं पारंपारीक घरां जंय लांकडाचे माळे आसात आनी सरभोंवतणी सैम फुल्लां. आमची संस्कृताय आनी परंपरा पाळून पर्यटक हांगां रावतात. आमी जशे घरांनी रावतात तशेच पर्यटक हांगां रावतात. तांकां शारांतल्यो सुविधा आमी दिनात. हे मांगर सध्या तुळस- वेंगुर्ला आनी दोडामार्गार आसात आनी रोखडेच आमी निगुडे- बांदा हांगाय सुरू करपाचे आसात. हे खातीर आमकां समविचारी शेतकार जाय आसता, जाका आमची संकल्पना आवडटा आनी ताका सैमा खातीर कितें तरी करीन दिसता ताच्याच वांगडा आमी हे मांगर मुखार व्हरतात.  

ह्या मांगरांचो लाव थंयच्या थळाव्या लोकांक कसो जातलो?

: गांवांतलें आनी रानांतलें सैम दाखयतनाच ह्या लोकां खातीर हें एक येणावळीचें साधन जावंक शकता. जमनी विकचे परस आसा तेच जमनीचेर अश्यो सुविधा तयार करून आमचो गांव लोकांक दाखोवपाची संद मेळटा. जे पर्यटक येतात तांकां वतना जर गांवठी मसाले आनी खूब कितें व्हरपाक मेळ्ळें जाल्यार तांकांय लाव जाता. 

‘कोंकण आमचो आसा’ अशें म्हणपी खूब तरणाटे सोशल मिडियाचेर दिसतात, पूण ते कोंकण राखपाक खातीर पोटतिडकीन वावुरतात अशें दिसता?

: आतांच्या तरणाट्यांनी अशें उलोवचे परस काम करून दाखोवपाक जाय आनी आमचें कोंकण आसा तशें उरचें म्हूण वावर करपाक जाय.  कोंकणांत येयात अशें आवाहन करपी हे तरणाटे जर कोंकणाच्या भायर आसात जाल्यार तांची सरबराय कोण करतलो? दुसरें म्हणल्यार फकत  फोटो काडपी पर्यटकांची गर्दी आमकां नाका, आमकां जाय अशे पर्यटक जे आमची परंपरा आनी संस्कृती शिकतले आनी ताचे विशीं हेरांक सांगतले.

सध्या एक परिस्थिती तयार जाल्या की गोंयचे भुरगे विदेशांत नोकरेक वतात आनी कोंकणांतले चडशे मुंबय, हें आडावप शक्य आसा?

: आमचे पुर्वज ‘करीयर ओरीयंटेड’ नाशिल्ले. तांच्या जिणेचो एकूच हेत आशिल्लो तो म्हणल्यार ह्या कोंकणा सारक्या सर्गांत स्वता जगचें. आमचे कडेन हांगां इतलें आसा की ताचो आस्वाद घेवपाक आमकां हो जल्म कमी पडटलो… तांणी पयशे जोडपाचें केन्नाच चितलें ना… पूण आतांची पिळगी आयफोन आनी हेर म्हारग गजाली विकत घेतात आनी म्हयनो सोंपता म्हणसर बोल्सांत पयशे आसनात. गांवांत रावता ताका खर्च खूब कमी आसता. शारांत तशें जायना. 

सुशेगादचो अर्थ बदल्ला असो दिसता?

: हय बदल्ला. लोकांक दिसता सुशेगादपणां म्हणल्यार आळशीपणां. तशें न्हय तें. आमच्या कडेन आशिल्ल्या साधनांनी आनंदान जगप आनी सैमाक कमीच कमी त्रास दिवन जगप हें सुशेगाद जगप अशें हांव म्हणटलों. आमचे पुर्वज 100 वर्सां जगले. आतांचे भुरगे तांकां आपले आदर्श मानीनात, ते आदर्श मानतात ते अभिनेते वा क्रिकेट खेळटल्यांक. आमी जें सध्या रील्सां वरवीं पळयतात तें एक आभासी जग आसा. तें इतलें खतरनाक जालां की भुरगे गांवांत रावून अमेरिकेक वचपाची मोख दवरतात. आमच्या गांवांत इतलें सुंदर सैम आसा, ताची तांकां जाणीवच ना. गांवांत शारीकरण हाडप हें चुकीचें. 

आमच्या आळशीपणाक लागून सैमाचेर हावळ येवंक लागल्या अशें दिसता?

: हीं आळशींपणां न्हय… आमच्यो म्हत्वकांक्षा वेगळ्यो आसात. तुकाराम महाराज एके कडेन म्हणटात ‘ठेविले अनंते तैसेचि रहावे चित्ती असू द्यावे समाधान’… सध्या कितलेंय मेळ्ळ्यार समाधान  जायना… आमी सोंपे तरेन पयशे जोडून आळशी जाले जाल्यार ताचो त्रास सैमाक जातलोच. लोकां मदीं पयशे जोडपाची हाव तयार जाली जाल्यार सैमाक त्रास जातलो. 

कम्युनिटी फार्मिंगाचो लाव जावंक शकता?

: खूब बरे भशेन जावंक शकता. पूण ते खातीर लोकांनी एकठांय येवन तें गंभीरतायेन घेवंक जाय. ताचो लाव तांकांच जातलो. 

आमच्या मातयेचो सुगंध शेणटलो असो दिसता?

: सध्या काँक्रिट जंगलाची उदरगत पळयली जाल्यार ती खूब गतीन मुखार वचपाक लागल्या. मोपा विमानतळ जातकच दोडामार्गार जमनीक किंमत येवंक लागल्या. खूब बदल जावंक लागल्यात. उत्तर भारतीय जमनी विकत घेवंक लागल्यात. हे खातीर झाडां मारपाचे प्रकार वाडपाक लागल्यात. अशें चालू उरलें जाल्यार आमचे मातयेचो सुगंध उरतलो?

म्हादय न्हंय कर्नाटकान वळोवपाचें चल्लां, हाचेर तुमचें मत कितें?

: कर्नाटकांत पिवपा खातीर उदक आसा. तांकां उदक जाय तें वेवसायीक शेती करपा खातीर.  म्हादय वाचोवपाचे उपाय आमकां राजकारणी दिवंक शकनात, तांचे अजेंडा वेगळेच आसतात. आमीच सगळ्यांनी मेळून म्हादय, हेर न्हंयो आनी पर्यावरण राखचें पडटलें… म्हादय वळयली जाल्यार गोंयच्या लोकांक खुबूच त्रास जातले.