पॅलेस्टायन समर्थकांचो म्हापशें बाजारात रॅली काडपाचो यत्न, पुलिसांनी आडायले
भांगरभूंय | प्रतिनिधी
म्हापशें, प्रतिनिधी ः इस्राएल- हमास झुजा उपरांत भारतीय परराश्ट्र मंत्रालयान आपली भुमिका स्पश्ट केली तरी लेगीत देशभरांतले कांय जाण ह्या विशया वयल्यान निदर्शनां करपाचो यत्न करतात. आयज सकाळीं म्हापश्यांच्या मुखेल बाजारांत असोच यत्न केला. कांय परकी पॅलेस्टायन समर्थकां वांगडा परदेशांतल्या लोकांनी बाजारांत रॅली काडली. विशेश म्हळ्यार पुलिसांनी तांकां आडावपाचो यत्न केलो. पूण तांणी आडनदर करून आपलीं निदर्शनां चालूच दवरलीं.
7 ऑक्टोबर 2023 सावन हमासान पॅलेस्टायनाच्या समर्थना खातीर इस्राएलाचेर क्षेपणास्त्रां उडयल्या उपरांत गाझा पट्टेंत खर झूज सुरू जालें. ह्या झुजांत दोनूय वटांनी विध्वंसक शस्त्रांचो उपेग करतात. हातूंत साबार सामान्य नागरिकांकय मरण आयलां. शेनवारा सकाळीं कांय परकी पॅलेस्टायन समर्थकांनी ह्याच विशयाचेर गोंयांतल्या म्हापश्यां शारांत रॅली काडपाचो यत्न केलो. हांची म्हायती मेळ्ळे बरोबर मामलेदारांनी रोखडेच पुलिसांक कळयलें. ते प्रमाण पुलिसांनी थंय येवन रॅली थांबयली आनी जमिल्ल्या समर्थकांक फाटीं सरपाची सुचोवणी दिली. तशेंच तांणी हाडिल्लो पॅलेस्टायनचो ध्वज आनी हेर सामान जप्त केलें.
पुलिसांनी आडायले उपरांत समर्थकांनी बाजारांतल्या एका च्या कॅफेंत आलाशिरो घेतलो. थंय तांणी आपल्या तोंडार पॅलेस्टायनाचो ध्वज रंगयलो. विशेश म्हळ्यार हातूंत बायलांचो आस्पाव चड आशिल्लो.
ह्या निदर्शना वेळार मामलेदार भिकू गांवस, पुलीस उपअधीक्षक संदेश चोडणकार, निरिक्षक सीताकांत नायक, विजय राणे आनी हेर अधिकारी पुलीस दळा वांगडा बाजारांत हाजीर आशिल्ले. हे पॅलेस्टायन समर्थक दनपारां सुमार 12.30 वरांचेर बाजारांतल्यान गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
