मयेंत मिनाची येरादारी परतून सुरू
भांगरभूंय | प्रतिनिधी
विरोध करप्यांक पुलिसांनी घेतले ताब्यांत
दिवचल, प्रतिनिधी ः केळबायवाडो – मयें सावन सुरू जाल्ल्या मिनाची येरादारी आडावपाक जमिल्ल्या लोकां मदल्यान पुलिसांनी पांच जाणांक ताब्यांत घेतले. तशेंच ही येरादारी पुलीस बंदोबस्ता खाला सुरू केल्या.
गांवातल्यान मिनाची येरादारी करपाचेर हायकोर्टान बंदी घालून लेगीत मयें गांवातल्यान येरादारी जाता असो दावो करुन आयज सकाळीं कांय थळाव्या लोकांनी ही येरादारी आडावपाचो यत्न केलो. सुमार 9 वरां मेरेन तांणी मिनाचे ट्रक आडावन धरलें. हे विशीं म्हायती मेळ्ळ्या उपरांत उपजिल्होधिकारी, मामलेदार आनी पुलीस केळबायवाडो हांगा पावले. ताणें आंदोलकांक समजवपाचो यत्न केलो. पूण येरादारीचेर ताणें खर हरकत घेतली.
उच्च न्यायालयाच्या आदेशा प्रमाण गांवांतल्यान मिनाची येरादारी करपाक बंदी आसा, तरी लेगीत परतून गांवांतल्यान ई- पावणेच्या मिनाच्या मालाची येरादारी सुरू जाल्या, देखून लोकांक त्रास सोंसचे पडटात. हाका लागून येरादारी आडायली अशें संतोषकुमार सावंत आनी हेरांनी सांगलें. पूण हे येरादारींक परवानगी आसा अशें मामलेदारांनी स्पश्ट केलें. तरी लेगीत आंदोलक आयकुपाक तयार नाशिल्ले. निमाणे पुलिसांनी पांच जाणांक ताब्यांत घेवन खर बंदोबस्त करुन परतून येरादारी सुरू केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
