कारीचो रिक्शाक धपको, एकलो जखमी
भांगरभूंय | प्रतिनिधी
बंद सिग्नल अपघाताचें कारण
मडगांव, प्रतिनिधी ः नुवेंत बंद सिग्नलाक लागून अपघातात वाड जावपाक लागल्यात. हाचे आदीं हे सुवातेर जाल्ल्या एका अपघातांत स्कुटर चालकाचे पांय फ्रॅकच्यर जाल्ले. हे घडणुके उपरांत आयज सकाळीं परतून एक फावट वेगान वचपी कारीन रिक्शाक धपको दिलो. हांतूत रिक्शा चालक जखमी जाल्ल्यान ताका उपचारा खातीर दक्षिण गोंय जिल्हो हॉस्पिटलांत दाखल केलो.
मेळिल्ले म्हायती प्रमाण, नावेलीचो राजाराम मयेकार आयज सकाळीं आल्टो कारींतल्यान वतालो. ताची गाडी नुवेच्या राजी मोटर्स लागसार जंक्शनाचेर पावली तेन्ना सिग्नल बंद आशिल्ल्यान रस्त्यार येवपी रिक्शेचो ताका अदमास येवंक ना. ह्याच सिग्नलाचेर मडगांव गांधी मार्केटांतलो रिक्शा चलोवपी अब्दुल हांच्या रिक्शाक कारीन धपको दिलो. हातूंत रिक्शा सुमार 10 ते 20 मीटर मेरेन फरफटत गेली . ह्या अपघातांत रिक्शाचे लुकसाण जाले आनी रिक्शा चालक अब्दुल हांचे तकलेक घावो जालो. तांकां बेगोबेग उपचारा खातीर दक्षिण गोंय जिल्हो हॉस्पिटलांत दाखल केले.
नुवेंतल्या हायवे वयले सगळे सिग्नल बंद आशिल्ल्यान रस्तो हुंपपी, रस्त्यार चलपी वा हेर गाडयांचो चालकांक अदमास येना. हाका लागून ह्या वाठारांत अपघात वाडत आसात. हाचे आदीं स्कॉर्पिओ गाडयेन दोन दुचाकींक धपको दिल्ल्यान एका चालकाचे पांय फ्रॅक्चर जाल्ले. हे खेपे आदलो आमदार विल्फ्रेड डिसा हांणी जन आंदोलनाची शिटकावणी दिल्या. आतां तरी ह्या अपघाता उपरांत सिग्नल सुरू करचो अशी मागणी थळाव्या लोकांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
