भांगरभूंय | प्रतिनिधी
ज्येश्ठ फुडारी प्रतिक्रिया दिवपाक तयार नात; कार्यकर्त्यां मदीं निरशेणी
पणजी: मंत्री तशेंच पणजीचे भाजपाचे आमदार बाबूश मोंसेरात हांणी आदले मुख्यमंत्री सर्गेस्त मनोहर पर्रीकार हांचेर तीन दिसां पयलीं केल्ले टिकेक लागून भाजप पदाधिकारी आनी कार्यकर्त्यां मदीं निरशेणी पातळ्ळ्या. पूण भाजपाच्या हेर ज्येश्ठ फुडाऱ्यांनी मात ‘मौन’ व्रत धारण केलां.
स्मार्ट सीटीच्या कामा वेल्यान उत्पल पर्रीकार हांणी केल्ल्या आरोपांक जाप दितना मंत्री बाबूश मोंसेरात उत्पल हांचे सयत मनोहर पर्रीकार हांचेर टिका केल्ली. 25 वर्सां पणजीचे आमदार आशिल्ले पर्रीकार हांणी जीं कामां केल्यांत ताचीं फळां आयज पणजेकार भोगतात. अणभवी अभियंते आसून लेगती फुटपाथ बांदिल्ल्यांक ह्या आमदारान सल्लागार केले. त्या सल्लागारांनी कोट्यांनी रुपया खाले अशें म्हणीत मनोहर पर्रीकार पणजेंतल्यान स्वताच्या नांवार वेंचून येताले. पणजेंतल्यान वेंचून आयिल्लो हांव पयलो भाजप आमदार आशिल्ल्याचो दावोय तांणी केल्लो.
हे विशीं ‘भांगरभूंय’ न शुक्रारा राज्यसभेचे खासदार आनी भाजपा प्रदेशाध्यक्ष सदानंद शेट तानावडे हांचे कडेन संपर्क सादलो तेन्ना आपूण सद्या गोंया भायर आसां. ह्या विशयाचेर उलोवंक शकना अशी जाप तांणी दिली.
आदले खासदार आनी प्रदेश सरचिटणीस नरेंद्र सावयकार हांणी ‘मनोहर पर्रीकारांचें कार्य आनी कतृत्व खूब मोटें आसा’ इतलीच जाप दिली. जाल्यार केंद्रीय मंत्री श्रीपाद नायक हांणी आपूण कालूच दिल्ली सावन गोंयांत आयलां. बाबूश मोंसेरात नेमके कितें उलयला तें आपल्याक खबर ना. तांणी केल्लें उलोवप आयकून उपरांतूच ह्या विशयाचेर उलयतलों अशें स्पश्ट केलें.
आदले आमदार आनी सरचिटणीस दामू नायक हांचे कडेन संपर्क सादपाचो यत्न केलो पूण तो जावंक शकलो ना.
पर्रीकारांचे थोडे तरी गूण घेवचे: वेर्णेंकार
मनोहर पर्रीकार हांचेर आरोप करप्यांनी तांचें थोडे तरी गूण घेवचे. पर्रीकार आधुनीक गोंयचे शिल्पकार आसात. पर्रीकार हांणी सदांच लोकां खातीर त्यागाची भावना दाखयल्या अशें सांगून भाजपाचे म्हणयारे गिरीराज पै वेर्णेंकार हांणी बाबूश मोंसेरात हांचेर टिका केली. पूण मुख्यमंत्री डॉ. प्रमोद सावंत, प्रदेशाध्यक्ष सदानंद शेट तानावडे हांचे सयत सगले ज्येश्ठ फुडारी बाबूश हांच्या आरोपांचेर उलोवपाक तयार नाशिल्ल्यान पणजेंतल्या भाजपा कार्यकर्त्यां मदीं खर निरशेणी पातळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
