हांवें खून करूंक ना, न्हिदेंत भुरग्याक सैमिक मरण, सूचनान खूनाचो आरोप न्हयकारलो

भांगरभूंय | प्रतिनिधी

खुनाचे सुवातेर वचपाक न्हयकार

पणजी ः आवयन आपल्या चार वर्सा पिरायेच्या पुताचो खून केल्ल्या प्रकरणाची चर्चा सध्या देशभर चालू आसा. ह्या प्रकरणांत दर दिसां नव्यो गजाली मुखार येतात. तेच वेळार चार वर्सां पिरायेच्या पुताचो खून केल्ल्यान ताब्यांत आशिल्ली आर्टिफिशियल इंटेलिजन्स कंपनीची धनी आनी सीईओ सूचना सेठ हिणें खुनाचो आरोप न्हयकारलो. पुताचो खून आपूण करुंक ना, ताका न्हिदिल्ल्या जाग्यार नैसर्गिक मरण आयलें अशें ती पुलिसांक सांगता. ते भायर सूचनान खून जाल्ल्या सुवातेर वचपाकय पुलिसांक न्हयकार दिला.
म्हापशें न्यायालयान सूचनाक 6 दिसांची पुलीस बंदखण दिल्या. देखून कळंगुट पुलीस ह्या प्रकरणाची दरेका अँगलान चवकशी करतात. पूण पुलीस तपासाक सूचना सेठ ही सहकार्य दिना. पोस्टमार्टम अहवालांत स्वास घुसमटल्यांन मरण आयिल्ल्याचे सांगलां. त्या भुरग्याचें तोंड आनी छाती सुजिल्ली आनी नाकांतल्यान रगत येतालें. भुरग्याच्या आंगाचेर रगत येवपाची वा संघर्श करपाचीं लक्षणां दिसूंक नात अशें कर्नाटकांतल्या हिरियुर तालुका हॉस्पिटलाचे प्रशासकीय अधिकारी डॉ. कुमार नायक हांणी दोन दिसां आदीं पत्रकारां कडेन उलयतना सांगिल्लें. पूण, चिन्मयाक मरण येवपाचें कारण नैसर्गिक आशिल्ल्याचे सूचनान पुलिसांक सांगलें.
मजगतीं, सिकेरी ज्या हॉटेलांत तिणें पुताचो खून केल्याचो दुबाव आसा थंय आयज तिका व्हरून त्या दिसा नेमकें कितें घडलें तें सोदून काडपाचो यत्न कळंगुट पुलीस करतात. पूण सूचनान ते सुवातेर वचपाक पुलिसांक न्हयकार दिलो.
सूचना सेठ आनी तिचो घोव व्यंकटरामन हांचे मदलो घरगुती वाद आनी भुरगो कोणाच्या ताब्यांत घेवपाचो हाचे वयल्यान सूचनान आपल्या पुताचो खून केल्ल्याचो दुबाव पुलिसांक आसा. हाचे पयलीं तिणें आपल्या घोवाचेर घरगुती, मानसीक छळ आनी त्रास दिवपाचो आरोप केला. बेंगळुरूच्या न्यायालयांत हे विशीं सुनावणी चालू आसा. पूण सूचनाच्या घोवान हे सगळे आरोप न्हयकारल्यात.