भांगरभूंय | प्रतिनिधी
६३,७२० रुपयांचो १९५ लिटर सोरो जप्त
पणजी, प्रतिनिधी : गोंयच्यान बांदा- महाराष्ट्रांत सोर्याची तस्करी करपी विशांत पांगम (पत्रादेवी) हाका मोपा पुलिसांनी ताब्यांत घेतलो. ताचे कडल्यान ६३,७२० रुपयंचो १९५ लिटर सोरो जप्त केला. जप्त केल्लो सोरो पुलिसांनी अबकारी खात्या कडेन दिला.
पुलिसांनी दिल्ले म्हायती प्रमाण, पत्रादेवीच्यान बांदा महाराष्ट्रांत रातच्या वेळार सोर्याची तस्करी जावपाची आशिल्ल्याची म्हायती मोपा पुलिसांक मेळ्ळी. ते प्रमाण पुलीस निरीक्षक नारायण चिमुलकार हांच्या मार्गदर्शना खाला पुलीस हवालदार धोडू तुळस्कार आनी आस्तीक नायक हांणी पत्रादेवी वाठारांत बुधवारा रातच्या ८.३० ते ९.३० मजगतीं सांपळो रचलो. ह्या वेळार ते सुवातेर एक ओमनी व्हॅन आयली. ती पुलिसांनी आडोवन चालकाची चवकशी केली. व्हॅनची झडती घेतली तेन्ना तातूंत सोर्याचीं २० बाॅक्सां मेळ्ळीं. हो सोरो ६३,७२० रुपया मोलाचो आशिल्लो. उपरांत पुलिसांनी चालक विशांत पांगम हाका ताब्यात घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
