भांगरभूंय | प्रतिनिधी
कोमुनिदाद प्रशासकान काम बंदचो दिल्लो आदेश रद्द
म्हापशें, प्रतिनिधी ः रामतळें हळदोणेच्या एमआरएफ (कोयर जमोवपाची सुविधा) शेडीच्या बांधकामा विशीं काम बंदचो जारी केल्लो आदेश उत्तर गोंय कोमुनिदाद प्रशासक सागर गावडे हांणी रद्द केला. ह्या आदेशा उपरांत हळदोणें पंचायतीक समाधान मेळ्ळां. जाल्यार रामतळें हांगाच्या ग्रामस्थांक बरोच व्हड धपको बसला.
एमआरएफ शेडीच्या बांधकामाक बेकायदेशीरपणान ना हरकत दाखलो दिवन कोमुनिदाद बोआ एस्पेरन्का ऑफ हळदोणची वेवस्थापकीय समिती आनी कारकुना आड कोमुनिदाद प्रशासकां कडेन फाटल्या १२ डिसेंबराक रामतळेंचे नागरीक विष्णू नायक हांणी ग्रामस्थां वतीन कागाळ केल्ली. ते प्रमाण प्रशासकांनी हळदोणा पंचायतीक सर्व्हे क्रमांक ३४३/१६ ह्या जाग्या वयले शेडीचे बांदकाम बंद करपाचे निर्देश दिल्ले.
बुधवारा सांजेवेळार ह्या प्रकरणांत प्रशासकां कडेन सुनावणी जाली. ह्या वेळार कोमुनिदाद समितीचे प्रतिनिधी, ग्रामस्थ आनी हळदोणा पंचायतीचे प्रतिनिधी हाजीर आशिल्ले. युक्तीवाद आयकून घेतल्या उपरांत प्रशासक गावडे हांणी कागाळदारांचो दावो आपल्या आदेशांत भायर मारले.
प्रशासकांनी आदेशांत म्हणलां, जमीन दिवपाक पात्र आशिल्ल्या व्यक्तींच्या वर्गा मदीं एक थळावी वा सरकारी संस्था आसा. कलम ३३४ अ (४) खाला दिल्ल्या सरकारी विभाग वा थळावे संस्थेचे व्याख्येंत ग्रामपंचायत बसता. हे वस्तूस्थितींत कसलोच वाद ना. कलम ३३४ अ प्रमाण कोमुनिदाद जमीन मंजूर करपा खातीर सरकारा कडल्यान मंजुरी घेवपाची गरज न्हयकारूं येना. पूण सध्याचे वस्तुस्थितींत तें घातकी थारूं येना. कारण सरकाराची मान्यताय आनी वर्सुकी भाडें हे विशीं नाहरकत दाखलो स्वताच एनओसीचे सुवादीन आसा.
सरकारचे फुडले मान्यताये बगर पुरायेन एनओसीच्या आधारान संबंदीत जमीन वापरपाची ग्रामपंचायतीची कृती अयोग्य आसा, हातूंत दुबाव ना. मात असो वापर बेकायदेशीर वा अतिक्रमण म्हणू येना. कारण सरकार हाका मान्यताय वा मंजूरी दिवपाक शकता. ताका लागून म्हज्या मतान हें अनियमीत अनुदानाचें प्रकरण आशिल्ल्यान बेकायदेशीर ना, असो निश्कर्श कोमुनिदाद प्रशासकांनी ह्या आदेशांत नोंद केला.
मजगतीं, मंदीर समितीचे वकील ऍड. विनायक पोरोब हांणी,हांव ह्या आदेशान बेजारलां. कारण बांधकाम बंदाचो आदेश दिवंक ना. कोमुनिदाद प्रशासकांच्या ह्या आदेशा आड हांव वरिश्ठ न्यायाधिकरणाकडेन आव्हान दिवन म्हजो मुद्दो मांडटलो. तशेंच ग्रामस्थ शांततायेन आंदोलन चालूच दवरतले, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
