भांगरभूंय | प्रतिनिधी
चित्रदुर्ग, खबरां संस्था : सुचना सेठ हांणी आपल्या चार पिरायेच्या पुताचो खून केल्ल्याची खबर काल पुराय देशांत पातळ्ळी. सुचनान पयलीं आपल्या पुताचो खून केलो आनी ताची कूड पोतयेंत घालून ती व्हरताली. त्या वेळार तिका अटक जाली. सुचना सेठ ही द माईंडफुल या एआय लॅबची संचालक. तिच्या पुताची कूड पुलिसांनी पोस्टमार्टमा खातीर धाडली. ह्या प्रकरणांत आतां अहवाल आयला. चार वर्सांचो भुरगो कसो मेलो? तें कारण आतां समजलां.
चित्रदुर्ग हांगच्या हिरीयुर तालुका हॉस्पीटलाचे प्रशासकीय अधिकारी डॉ. कुमार नायक हांणी हे विशीं म्हायती दितना सांगलें, चार पिरायेच्या भुरग्याक तोंडार उशें वा दाट कपडो घालून खून केलो. ह्या प्रकरणांत घुस्मटमाराक लागून भुरग्याक मरण आयलें. ताच्या तोंडार उशें वा दाट कपडो दवरिल्ल्याचो दुबाव आसा. गळो दामिल्ल्याच्यो खुणो नात.
तशेंच मरणा उपरांत स्नायू ताठ जावपाची प्रक्रिया ( rigor mortis ) ह्या भुरग्या संबंदी घडूंक ना. ३६ वरां आदीं वा ताचे पयलीं ताचो खून जाला. अशीय म्हायती डॉ. नायक हांणी दिली. भुरग्याचे कुडींतल्यान रगत व्हांविल्ल्याच्यो कसल्योच खुणो नात अशेंय तांणी म्हणलें.
कुडीचेर निमणे संस्कार
आर्टिफिशिअल इंटेलिजन्स कंपनीची संस्थापक, सीईओ आशिल्ली सुचना सेठ हिणें गोंयांत कांदोळेच्या एका हॉटेलांत आपल्या चार वर्सां पिरायेच्या पुताचो खून केल्लो. ह्या चल्याचे कुडीचेर आयज ताच्या बापायन बंगळुरांच निमणे संस्कार केले.
त्या चल्याचो बापूय व्यंकट रमण हांणी आपल्या पुताची कूड चित्रदुर्ग हांगच्या एका थळाव्या अपार्टमेंटांत व्हेली. थंय धर्मीक विधी केले. उपरांत राजाजी नगरांतल्या हरिश्चंद्र घाटाचेर कुडीचेर निमाणे संस्कार जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
