भांगरभूंय | प्रतिनिधी
भीष्माचे ते उलोवप आयकून दुर्योधनाची तकली सटकली. तो रागान उबो रावलो आनी ताणें म्हणलें, म्हजो बापूय आतां हस्तिनापूराचो राजा आसा.
आदि- पर्व 22
परत हस्तिनापूरांत
(तांच्या वांगडा कृष्ण आनी बलराम हे लेगीत कांय दीस हस्तिनापूराक रावया, असो विचार करून आयले… आतां फुडें…)
पांडव हस्तिनापुराक येवपाक तयार जायना फुडें, विदूरान, आपूण, पांडव, कुंती आनी द्रौपदीक घेवन येता असो निरोप धृतराष्ट्राक धाडलो. पांडवाच्या लग्नाक हाजीर आशिल्ले कृष्ण आनी बलराम कांय दीस हस्तिनापूरांत रावून मागीर द्वारकेक वतले अशेंय सांगून धाडले. तांणी मरणांत काडिल्ले पांडव आपले बायलेक घेवन परत हस्तिनापूरांत येतात आनी तांचेबाराबर द्वारकेचे कृष्ण आनी बलरामूय आसात. हे कळतकूच हस्तिनापूरातली प्रजा सामकी खोशी जाली. तांणी सबंद हस्तिनापूर रंगोवन सजयलें. पांडव हस्तिनापूराक पावता त्या दिसा सगले हस्तिनापूरूच शिमेर लोटले.
भीष्मान स्वता धृतराष्ट्राक आपले वांगडा घेवन पांडवाक येवकार दिलो. द्रौपदीची सुंदरकाय पळोवन जामिल्ल्या सगल्या लोकांक अजाप जाले. मागीर हस्तिनापूराचे प्रजेन पांडवांक वाजयत गाजयत शिमे वयल्यान राजवाड्या मेरेन व्हेले. राजवाड्याच्या दारांत गांधारीन दुर्योधनाक बळयां ओडून हाडून आपले वांगडा उबो केल्लो. दोळ्यार पट्टी बांदिल्ले गांधारीन आपूण स्वता द्रौपदीक उंवाळ्ळी आनी तिची नदर काडून तिका राजवाड्यांत भितर घेतली. मागीर सगले लोक द्रौपदीचे सोबितकाये विशीं उलयत उलयत घरा गेले.
दुर्योधनान कृष्ण आनी बलरामाक आपल्या म्हालांत रावपाक आपयले. पूण कृष्णान आपूण आते कडेन म्हळ्यार कुंतीकडेन रावूंक वता, अशें सांगले आनी बलरामाक ताचेकडेन धाडलो. दुर्योधनाच्या म्हालांत वतना बलरामान उलयता उलयता कांपिल्यनगरांत आपूण भीमाक गदायुद्धाचे कांय धडे शिकयले हे ताका सांगलें. जालें ! दुसऱ्या दिसा सावनूच दुर्योधनान बलरामा वांगडा गदायुद्धाचो सराव करपाक सुरवात केली. दुर्याधनाक शिकयतना तो भीमा परस श्रेश्ठ गदावीर आसा हें बलरामाच्या लक्षांत आयलें. ते खातीर बलरामाच्या मनांत दुर्योधना विशीं आपुलकाय उत्पन्न जाली.
द्वारकेच्यान आयिल्ल्यांक खूब दीस जाल्ले ते खातीर बलराम द्वारकेक परत गेलो. पूण कृष्ण गेलो ना. पांडवांचो प्रश्न जाग्यार उडयल्या बगर द्वारकेत वचप ना अशें ताणें थारायिल्ले. कांय दिसांनी धृतराष्ट्रान सगल्या कौरव – पांडवांक आपल्या दरबारात आपयले. भीष्म, विदूर, द्रोण, कृप, अश्वत्थामा, कर्ण, शकुनी हें सगले दरबारांत हाजीर आशिल्ले. कृष्णाकूय धृतराष्ट्रान मुद्दाम दरबार पळोवपाक म्हणून आपयल्लो. सगले आसनांचेर बसल्या उपरांत धृतराष्ट्रान उलोवपाक सुरवात केली. तुमकां सगल्यांक खबर आसा की मेले म्हणून समजिल्ले पांडव परत हस्तिनापूरांत आयल्यात आनी आतां ते ह्या दरबारांत हाजीरुय आसात. जशें शंबर कौरव तशेंच पांच पांडवूय बी म्हजे पूत. म्हाका एकशें पांच पूत आसात अशेंच हांव समजता. फाटीं कितें घडलां तें सगलें पांडवांनी विसरचें आनी नव्यान सुरवात करची अशें हांव पांडवां कडेन मागतां. आयचो दरबार भरोवपाचें कारण म्हणल्यार, पांडव या जगात ना अशें कळल्या उपरांत हांवे दुर्योधनाक युवराज केलो. ताचे पयलीं युधिश्टीराक हांवें युवराज म्हणून अभिशेक केल्लो. ह्या दोगां भितर कोणाक युवराज म्हणून दवरचो असो प्रस्न म्हाका पडला. तेन्ना तुमका हाचेर कितें सुचता जाल्यार ते म्हाका संगात.”
कांय वेळ कोणूच उलोयलो ना. मागीर भीष्म उठलो आनी ताणें म्हणलें, राजा, हे राज्य पंडून वाडयलां. तुजो हांतून कांयच पराक्रम ना हेंय तूं जाणा. म्हणून तुवेंन युधिश्टीराक युवराज केलो आनी हस्तिनापूराचो फुडारातलो राजा थारायलो. तुवेन ती खूब बरी गजाल केली. आता तो परत आयला जाल्यार ताचो हक्क तुवें ताका परत दिवचो अशें म्हाका दिसता. ” भीष्माचे ते उलोवप आयकून दुर्योधनाची तकली सटकली. तो रागान उबो रावलो आनी ताणें म्हणलें, म्हजो बापूय आतां हस्तिनापूराचो राजा आसा. ताणें म्हाका युवराज म्हणून घोषीत केला. तेन्ना हस्तिनापूराचेर म्हजो हक्क आसा आनी कोणाकुच तो अधिकार ना.” दुर्योधन आनीकुय उलयतलो आसलो, पूण धृतराष्ट्रान ताका ओगी राव म्हणून सांगलें.
(फुडें चलता….)
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
