भांगरभूंय | प्रतिनिधी
तुयेंचे भगवती देवीची जात्रा आयतार 17 डिसेंबराक जाता. ते निमतान देवस्थानाची म्हायती दिवपी लेख.
आमचें गोंय म्हणल्यार दक्षीण कोंकण दर्यादेगेर वशिल्ली कोकणकाशी. फुलांक मोसमांत जसो भार येता, तसो देवदेवतांच्या प्राकारांचो तिका भार आयला. पावला पावलाचेर सोबीत देवळां. हांगाचो दरेक गोंयकार श्रद्धाळू, धर्मीक. हांगा उत्सवूय खूब. अशेंच एक पुण्यस्थान म्हणल्यार पेडणेंचें भगवती देवूळ. भगवती माता म्हणल्यार उग्ररुपी महिषासुरमर्दिनी, सौम्यरुपी सांतेरी शांतादुर्गा, शिवरायांची देवी भवानी, वीर सुभाषाची दुर्गामाई.
गांवांत साबार देवळां आसात. भगवती देवीचे उजवे वटेन सांतेरी, मुखार महादेव तशेंच भुमिपुरुस. अशा देवतांच्या सहवासांत भगवती देवीची मनाक ओढ लावपी अशें देवूळ आसा. गोंयच्या खाची कोनशांत, विदेशांत देवीचे भक्त शिंपडल्यात. ते जात्रेक चुकनासतना येतात.
भगवती देवीची आख्यायिका अशी. एकदा देवी कमळ काडपाक पाणवठ्यार गेली. तेन्ना तिची धाकली भयण पार्सेंची भगवती देवी तिच्या आसनाचेर येवन बसली. तिणें मोठ्या मनान तिका तें आसन दिलें. तुयेंच्या सोबीत थळाचेर भगवती देवीची 400 वर्सां पयलीं स्थापना जाली. देवळाचो मनोरो पोरणें पद्दतीचो आसा. भगवती देवीक ‘गोवरेची आग’ ह्या नांवान पाचारतात. गांवकारांची तिचेर श्रद्धा आसा. कसलेंच बरें काम करतना भगवती देवीचो प्रसाद आनी आशिर्वाद घेतले बगर लोक कसलेंच काम करीनात.
ह्या गांवांत ल्हान- व्हड मेळून चाळीशेक उत्सव मनयतात. हो गांव म्हणल्यार उत्सवांचें कुळारुच म्हणपाक जाय. कुशीक शापोरा न्हंय आसा. तिच्या अस्तित्वान गांवाक सोबा आयल्या. जात्रेच्या आदले दीस पालखी गांवांत भोंवता. गांवांतले चडशे लोक नोकरी, शिक्षण, वेवसाया निमतान शारांनी पावल्यात. तरी जात्रा आनी हेर सणांक ते येतात. तांकां देवीच्या दर्शना बगर चैन पडना. जात्रे दीस देवूळ विजेचे रोशणायेन सोबयतात. तेन्ना तें पळोवपाक आकर्शक दिसता.
आयतार १७ वेर सकाळीं नवचंडी, आरती, रातीं पालखी, फोगाची आतशबाजी, पावणी आनी मागीर दशावतारी नाटक जावन जात्रा सोंपतली. सगल्या गोंयकारांनी हे जात्रेक मुद्दाम येवचें. तुमकां मायेमोगाचें आमंत्रण.
– प्रा. सुशांत तुयेंकार,
नावेली- मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
