भांगरभूंय | प्रतिनिधी
अन्न, वस्त्र आनी निवारो ह्यो मनशाच्यो मुळाव्यो गरजो. आतांच्या तेंपार तांतूत आनीकूय कांय गजालींचो आसपाव जाला, पूण ह्योच गरजो देशाच्या अमृत महोत्सवी आनी गोंयच्या हिरक महोत्सवी वर्सांतूय जर लोकांक फावो जावंक ना जाल्यार ताका जापसालदार कोण, हो प्रस्न आतां मुखेलपणान मुखार आयला. फुडल्यो लोकसभा वेंचणुको एप्रील, मे म्हयन्यांत जावंपाच्यो आसात. ल्हव-ल्हव राजकी वातावरण तापपाक सुरवात जातली. ‘नेमेची येतो पावसाळा’ हे म्हणी प्रमाण परतुन एक फावट गोंयांतल्या अनधिकृत घरांचो विशय नियोजितरित्या परतुन एक फावट चर्चेक हाडपाचो राजकी पक्षांचो राजकी डाव सुरू जाला. ह्या अनधिकृत घरां आनी हेर बांदकामां मदीं परप्रांतीयां वांगडा गोंयकारांचोय आसपाव आसा. मतांचेर नदर दवरून लोकांच्या मनांत भिरांत तयार करप आनी वेंचणुकेंत आपली पोळी भाजून घेवप ही पद्धत तशी पोरणीच, पूण हातूंत राजकी पक्षांचे आयदन बरे पयकी चुलीर तापून येता. म्हणटूकच तें आतां चुलीर दवरलां म्हणपाचें.
मुख्यमंत्री दोतोर प्रमोद सावंत हांणी वास्को कोमुनिदादींतलीं बांदकामां कायदेशीर करपाक कायदो हाडटले अशें म्हणल्या उपरांत हो विशय तापूंक लागला. आरजी आनी गोवा फॉरवर्ड हे प्रादेशिक पक्ष अशिल्ल्यान तांणी ह्या विधानाचेर खर टीका करून परप्रांतीय मतां खातीर सरकार हें करपाक सोदता,अशी टीका केली. हेर विरोधी पक्ष म्हटल्यार काँग्रेस, आप, तृणमूल काँग्रेस हांचे कडल्यान आजूनूय तशी प्रतिक्रिया येवंक ना, कित्याक तर तांका ती दिवप परवडपाचें ना. मुख्यमंत्री उलयले खरे, पूण त्या उपरांत पंचायतमंत्री मॉविन गुदिन्हो हांणी ह्या विशयाच्या उज्यांत पॅत्राॅल ओतपाचें काम केलें. तांणी उक्तेपणी ह्या अनधिकृत बांदकामांचे समर्थन करून ती कायदेशीर करचींच पडटलीं,अशें नेटान सांगलां. तीस ते चाळीस वर्सां हे लोक हांगा रावतात. कांय लोक आपलें वैयक्तीक कॉत्रपण फुडें करून ह्या लोकां आड कागाळ करतात आनी कोर्टांत वतात. आतां कोर्टा कडल्यान हीं बेकायदेशीर बांदकामां मोडपाचे आदेश येतात. कोर्ट कायद्या प्रमाण वागता, पूण ह्या लोकांचेर कारवाय करप योग्य थारतलें कांय कितें, असो प्रस्न मॉविनबाब करतात. एक जेश्ट मंत्रीच अशे तरेन बेकायदा गजालींक पालव दिवपाक लागलो जाल्यार मागीर हें कायद्याचें सरकार म्हणपाचें धाडस कोण करतलो? नीज गोंयकारांच्या आड आपल्या वोट बँकेक थाकाय मेळोवन दिवपाचो छुपो डाव कोणें खेळपाचो यत्न केल्यार कितें म्हणपाचें?
हालींच्या तेंपार कोमुनिदाद जांव नाजाल्यार हेर सरकारी जमनींचेर उबारिल्ल्या बेकायदा बांदकामांचेर कारवाय करपाचे कितलेशेंच आदेश कोर्टा कडल्यान जारी जाल्यात. पंचायत, मामलेदार, उपजिल्होधिकारी, प्रशासकी लवाद हांच्या मुखार आसपी प्रकरणांनी सरकार हस्तक्षेप करूं शकता, पूण आतां मुंबय उच्च न्यायालयाच्या गोंय खंडपीठानूच कितल्याशाच जाग्यां वयली बेकायदा बांदकामां मोडपाचें आदेश दिल्या उपरांत हे वोट बँकेचेर आपली राजकी कारकिर्द घडयल्ल्या फुडाऱ्यांची नीद चाळवल्या. न्यायालयाची कारवाय टाळपाक विधानसभेंत कायदो तयार करून वा दुरूस्ती करून ह्या बांदकामांक थाकाय मेळोवन दिवपाची एकूच वाट तांचे कडेन उरता आनी आपल्या ह्याच अधिकाराचो उपेग आनी वापर करून ह्या लोकांक थाकाय मेळोवन दिवपाची ताकतीक सद्याक सुरू आसा.
राज्याचे मुख्यमंत्री ह्या नात्यान अनधिकृत घरांनी रावपी हे सगले लोक सरकाराच्या येवजण्यांचे लाबार्थी, पंदरा वर्सांच्या राबित्याचो दाखलो तांचे कडेन आसा आनी ताका लागून कांय जाण सरकारी सेवेंतूय आसात. मागीर तांकां सरकार नीज गोंयकार म्हूण मानता. हांतूत सरकाराचो वा मुख्यमंत्र्यांचो दोश आसा अशें म्हणूंक मेळचें ना. हे लोक परप्रांतीय आसात म्हूण तांची कितल्याशाच वर्सांची बांदकामां अचकीत मोडपाची कृती समर्थनीय जांवक शकना, मागीर करपाचें कितें असो प्रस्न प्रशासन आनी सरकारा मुखार तयार जाला.
भारतीय घटने प्रमाण दर एका राज्याक आपलें प्रादेशीक अस्तित्व सांबाळपाचो आनी ताची जपणूक करपाचो अधिकार आसा. मागीर प्रादेशिक तत्वा प्रमाण नीज गोंयकार कोण हें आतां थारावप गरजेचें जालां. आरजी ह्या नव्यानूच स्थापन जाल्ल्या पक्षान ‘पोगो’ हे बील तयार केल्लें. ‘पर्सन ऑफ गोवन ओरीजीन’ म्हटल्यार मुळ गोंयकार अशी व्याख्या तांणी थारायल्या. गोंय मुक्ती उपरांत म्हटल्यार 19 डिसेंबर 1961 ही तारीख कटऑफ दवरून ही व्याख्या आसची, अशें तांचे म्हण्णे. आतां तें मानून घेवप कांय ना हें विधानसभेंचें काम, तरीय पूण ह्या विशयाचेर चर्चाच करपाची ना, हें सरकारचें धोरण चुकीचें अशें दिसता. विधानसभेंतल्या सगल्या वांगड्यांनी चर्चा करून आनी एका मतान नीज गोंयकारांची व्याख्या निश्चित करची पडटली आनी ते प्रमाण सरकाराचीं धोरणां आखून नीज गोंयकार आनी गोंयांत येवन स्थायिक जाल्ल्या लोकांची वळेरी तयार करची पडटली. नीज गोंयकारां खातीर वेगळी तरतूद आनी मागीर गोंयांत येवन स्थायिक जाल्ल्या लोकां खातीर वेगळी सुट दिवूंन सरकाराक आपलो कारभार फुडें व्हरचो पडटलो. हें बेगीनूच करूंक ना जाल्यार खरो नीज गोंयकार शेणपाचीच चड शक्यताय आसा.
नीज गोंयकार कोण हें थारावपाक वेगवेगळ्यो गजाली प्रमाण मानूंक येतां, पूण निमणें राजकारण हें मतांचेरूच निंबून आशिल्ल्यान सरकाराचीं धोरणां हीं मतांचेर नदर दवरून तयार करपाचें सुत्र आपणायलें जाल्यार मागीर गोंयचे प्रादेशिक अस्तित्व कशें तिगोवन दवरचें हें एक आव्हान म्हूण उबें रावूं येता.
कुळ आनी मुंडकारां खातीर कायदे आसात आनी ताचो प्रामाणिकपणान वापर करून हीं प्रकरणां निकालांत काडूं येतात. कोमुनिदाद जमनींचेर बेकायदा बांदकामां उबीं रावल्यात ताचे खातीर सरसकट तीं अधिकृत करपाचें थारोवप योग्य जावंक शकना. ताचेर वेगळे तरेन विचार करचो पडटलो. तें तशें जायना जाल्यार मागीर कायदो, नेम हांकां हांगासर कांयच वालोर ना म्हणपाचो. हे तरेन कायद्यान वागपी नागरीक हो मुर्ख थारतलो. आमच्या प्रशासकीय पद्दतीन कायद्यान वागपी मनशाचो मान दवरूंक जाय, पूण बेकायदा वागपी मनशाक जर कायद्याचो पालव मेळटा जाल्यार मागीर कायद्यान वागपाची गरजूंच कितें, असो चुकीचो संदेश समाजांत वचूंक शकता.
खंयच्याय बेकायदा आनी अनधिकृत गजालींक चड तेंप पालव मेळ्ळो जाल्यार हीं प्रकरणां अवघड जाग्या वयलीं दुखणीं जातात. तोच प्रकार हांगासर घडला. लोकांच्या माथ्यार कायदेशीर घरांचो आसरो मेळत जाल्यार मनशाक जिणेंत स्थिरता येवंक शकता. अर्थीक आनी सामाजिक नदरेतल्यान थीर जाल्लो मनीसूच आपले जिणेंत योग्य निर्णय घेवंक शकता. ताचेर कसलेंच चेपण आसूंक शकना. पूण मनीस थीर जालो जाल्यार मागीर राजकी फुडारी आनी पक्षांचें कितें जातलें? तांकां वालोर कित्याक उरतलो? अस्थिर मनशांक जाय तसो वागोवंक आनी गुलाम करूंक मेळटा. होच मंत्र जपून ही मनशाचे जिणेंतली अस्थिरताय कायम दवरून तांच्या कमजोरपणाचो राजकी लाव मेळोवपाची संद राजकी लोक कशें व्हगडायतले? हें सगळें राजकी गणित पळयत जाल्यार हो विशय खरोच सुटावो जातलो कांय कितें हें बाबतीत दुबावूच आसा. पूण हें अशेंच चलपाचें जाल्यार मागीर आमचो फुडार काळखाचोच आसा, हें सांगपाक कोणा ज्योतिश्याची गरजूच ना.
किशोर नायक गांवकार
7774039242
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
