भांगरभूंय | प्रतिनिधी
आदि पर्व १८
द्रौपदी – स्वयंवर
(हो धोणूर्विर कोण आसतलो, हें आतां स्वयंवरा वेळारूच सगल्यांक कळूंक शकतालें.)
द्रौपदी – स्वयंवराची मजा पळोवंक वचपी ब्राह्मण आनी तांचे वांगडा आशिल्ले पांडव कांय दिसांनी पांचालांची राजधानी कांपिल्य – नगरांत पावले. आपले दक्षणेतलो वांटो पांडवाक दिवचो पडत म्हणून तांचो वांगड त्या ब्राह्मणांनी सोडलो आनी ते दुसरे कडेन गेले. स्वयंवराच्या निमतान सबंद नगर लोकांनी सजयल्ले. पांडवा भशेन भोंवतणच्या सगल्या राज्यांतले लोक स्वयंवर पळोवपाक मुद्दम आयिल्ले. द्रुपदान दवरिल्ल्या पणा विशीं तांच्या कानार आयिल्लें तेन्ना खंयचो धोणूर्विर स्वयंवर मंडपातल्यान द्रौपदीक व्हरता हें पळोवपाची तांकां उमळशीक आशिल्ली. सगले वटेन गजबज आशिल्लो. पांडव तांकां रावपाक घर सोदूंक लागले. पूण, भायर सावन आयिल्ल्या लोकांनी सगलीं घरां स्वयंवर जायसर रावपाक म्हणून पयलींच घेतिल्लीं. शेवटाक एका कुमारान आपल्याच घरांत पांडवांक रावपाक सुवात दिली. पांडव मागीर त्या कुमाराच्या घराच्या अर्द्या कुडक्यांत बिराडाक रावूंक लागले.
दुसऱ्या दिसा सावन पांडवांनी कांपिल्यनगरांत भिक्षा मागपाक सुरवात केली. वारणावतांतल्यान पळून आयिल्ल्याक आतां दोनेक वर्सां जाल्लीं. तांचे केस वाडिल्ले, तोंडार खाडां, मिशयांची रानां जाल्ली. कमरेक धवें धोतर, खांदार धवो पंचो, गळ्यांत जानवें, ह्या भेसांत पांडव खरेलेच ब्राह्मण कशे दिसताले. कांपिल्य नगरांतली प्रजा स्वयंवर आशिल्ल्या कारणान मोटे उमेदीन आशिल्ली. ते खातीर कांय घरां भोवल्या उपरांत पांडवांक तांकां जाय तितले अन्न रोखडेंच मेळटालें. परत आयले उपरांत कुंती आनी पांडव, भिक्षा मागून हाडिल्लें अन्न एकठांय बसून जेवतालीं.
अशेच कांय दीस गेले आनी शेवटाक स्वयंवराचो दीस उजवाडलो. नगरांतले लोक स्वयंवर- मंडपांत स्वयंवर पळोवपाक जमले. पांडव घरांतूच बसून आशिल्ले. तांकां तशें बशिल्ले पळोवन घर मालकान म्हणले, ‘आरे, तुमी स्वयंवर पळोवपाक वचनात? चलात बेगीन! अशी संद तुमकां आनीक परत मेळची ना’. कुमारान तांकां अशें म्हणीना फुडें सगळ्या पांडवांनी स्वयंवराक वचपाचें थारायलें. ताणी कुंतीक ‘आमी वता गे’ अशें म्हणून स्वयंवर मंडपा वटेन आपलीं पावलां वळयलीं. थंय पावल्या उपरांत पळयतात तर कितें? सगलो मंडप लोकांनी भरिल्लो. स्वयंवराक आयिल्ले राजा आनी राजकुंवर एके वटेन बाशिल्ले. थंय दुर्योधन, दुःशासन, कर्ण, शिशुपाल हे हेर राजा वांगडां बशिल्ले. दरेकांच्या मनांत द्रौपदीक जिखपाची इत्सा आशिल्ली. द्रुपद राजा स्वता सगल्या राजांचें स्वागत करून तांकां आसनार व्हरून बसयतालो. दुसरे वटेन ब्राह्मणांक बसपाक आसनां मांडिल्लीं. उरिल्ली जागा स्वयंवर पळोवंक आयिल्ल्या लोकांनी आडायल्ली. ब्राह्मणां खातीर जीं आसनां दवरिल्लीं थंय वचून पांडव बसले. तांणी दुर्योधन बशिल्लो थंय नदर मारली. दुर्योधनानूय तांकां पळयले, पूण ते पांडव आसत असो दुबाव पसून ताका साप आयलो ना.
मंडपाच्या बरोबर मद्दीं तेलान भरिल्ले मोटे घंगाळ दवरिल्लें. ताच्या बरेच वयर रथाचें एक चाक घुंवतालें. चाकाचे वयले वटेन चांदीचें एक नुस्तें हुमकळायल्ले. सगल्या लोकांच्यो नदरो धुंवतल्या चाकाचेर वचून थारावताल्यो.
कांय वेळान द्रुपदाचो पूत धृष्टद्द्युम्न आपली भयण द्रौपदी हिका घेवन मंडपांत आयलो. तांणी प्रवेश करिना फुडें सगलो मंडप ओगी जालो. सगळे लोक आनीक दुसरे कडेन पळोवपाचे विसरले आनी द्रौपदीक पळयतच रावले. एक बायल मनीस इतली सुंदर आनी सोबीत आसूं शकता हें लोकांक पयलें फावट कळ्ळें. थंय जमिल्ले राजा आपल्याक इतली सोबीत बायल मेळत जाल्यार कितलें बरें जातलें असो मनांतले मनांत विचार करूंक लागले.
धृष्टद्द्युम्नान मागीर शिंवासनार बशिल्ल्या द्रुपदाची संमती घेवन उलोवपाक सुरवात केली. ताणें म्हणलें, हांगासर जमिल्ल्या सगल्या लोकांक येवकार दितां. म्हजे भयणीच्या स्वयंवरांत वाटो घेवपाक आयिल्ल्यांक हांव स्वयंवर जिखपाक कितें करचें पडटलें तें पयलीं सांगतां. तुमी पळयलां आसतलेंच की मंडपाचे मदीं तेलान भरिल्लें एक गंगाळ आसा. गंगाळातल्या तेलान पळोवन वयर धुंवतल्या चाकाच्या बुरकातल्यान बाण मारून चाकाच्या वयर लायिल्ल्या चांदीच्या नुस्त्याचो जो कोण फोडटलो ताच्या गळ्यांत म्हजी भयण द्रौपदी फुलांची माळ घालतली. ते खातीर ताका फकत पांच बाण मारूंक मेळटले. तेन्ना कोणाकूय आपूण हे करूंक शकता अशे दिसता जाल्यार ताणे फुडें येवन गंगाळाचे कुशीक दवरिल्ले धोणू आनी बाण घेवन जरूर यत्न करचो. धृष्टद्युम्नान सांगिल्ले स्वयंवराचो पण आयकून द्रुपदाच्या मनांत द्रौपदीक घरांतूच बसोवपाची आसा अशें दिसता अशें लोक एकामेकां कडेन उलोवंक लागले. द्रौपदीची आस धरून आयिल्ले कांय राजा स्वयंवराचो पण कळ्ळ्या उपरांत आपल्या आसना वयल्यान आनीक उठलेच नात.
(फुडें चलता…)
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
