भांगरभूंय | प्रतिनिधी
हांव कांय वर्सां आदी सावन फिल्म सिटीन काम करतां. ती जालीच तर पयलो फायदो म्हाकाच जांव येता. पूण, तरीय आसतना हांव तिका कित्याक विरोध करता ताचेर मात्सो उजवाड घालतां.
कांय दिसां आदी म्हजो एक व्हिडिओ खूब चड प्रमाणांक लोकां मदीं फामाद जालो. कांय जाणांक तो आवडलो, ताणीं तुस्त, तोखणाय केली. जाल्यार कांय लोकांक तो मानवलो ना. ताणीं म्हाका राजकी पक्षाचो, दावे विचारसरणेचो आनी उदरगतीक आडमेळें हाडपी अशें बगलांट घालें. हो व्हिडिओ एका खबरांपत्राच्या वार्ताहरान घेतलो. म्हजो अणभव आनी त्या जाग्या खातीर आशिल्ल्या आपलेपणान हांवें ताका हयकार दिलो. उदरगतीक म्हजी ‘ना’ ना, पूण लोकांच्या जिवाक जें बादक आसा तें जबरदस्तीचें तांचेर लादून उदरगत, हें म्हाका पटना.
विशय आयलो म्हणून, काणकोणचो ‘भगवती पाठार’ हो सैमीक चमत्कार. पावसाचें उदक झिरपावन वर्सभर आमकां उदक दिवपी हो पाठार कांय लोकांक पयशांचो पोटलो दिसपाक लागला. मेकळी सुवात मरे ती, उदरगत करपाक कितें लुकसाण आसा? थळाव्या लोकांक नोकर्यो मेळटल्यो. मागीर थंय कितें तरी करपाक जाय. फाटल्या तेंपार आयआयटी हाडपाचो यत्न जालो, पूण ताका थळाव्या लोकांचो तेंको नासून तो प्रोजॅक्ट भायर व्हरचो पडलो.
दोंगरारूच कित्याक?
आतां हांगा फिल्म सिटी हाडपाचो बळयांच यत्न चल्ला. जमीन जरी कोमुनदादीची आसली तरीय उदक आनी हेर जीण वांचोवपी गरजां खातीर हो पाठार वा ही सुवात लोकांक उपेगाची पडटा. फिल्म सिटी दोंगरार कित्याक करपाक जाय? हाचे पयलीं हेर राज्यांनी तयार जाल्ल्यो फिल्म सिटी कितल्या थळाव्या लोकांक उपेगाक आयल्यात, तांचो उदरगतीचो वावर कितें? थळाव्या लोकांक कितली मजत जाल्या? ताचो फायदो कोणाक जाला? मुंबय सोडल्यार हेर राज्यांतल्या फिल्म सिटीची अवस्था ईएसजीन नियाळल्या कांय किदें? गोंयांत जावपी चित्रीकरणां मुख्यत्वान खंय जातात? हाचेर विचार करून, तो थळाव्या लोकां मुखार दवरचो.
हांव कांय वर्सां आदी सावन फिल्म सिटीन काम करतां. ती जालीच तर पयलो फायदो म्हाकाच जांव येता. पूण, तरीय आसतना हांव तिका कित्याक विरोध करता ताचेर मात्सो उजवाड घालतां.
भगवती वाठार म्हत्वाचो
भगवती पाठार हो जैवविविधतायेन नटला. तशेंच पर्यावरणाच्या द्रश्टेन तो खूब म्हत्वाचो. ह्या दोंगरा भोंवतणी गांवां आसात आनी तांच्या नितळसाणींचो, कार्बन फूटप्रिंटाचो निचरो करपाक ताची गरज आसा. ह्या रानांत वाग, बिबटे, पिसयो, जवादीं, चितळां, रानमाजरां, सोंशे, साळी, तरेकवार जीव जिवाणीं आसात. तशेंच खूब प्रकाराची सवणीं, जमनीर रावपी शेड्डे, सड्डूकां वस्तीक आसतात. तशेंच ह्या अटंग्या मळांनी माकडां, खेतीं, गवे, रानदुकर, कवडे, हड्ड्यो, साळोर्यो, बकीं अशीं शेतांक उपद्रव करपी सुकणीं, सावदांय रावतात. तांचो राबितो काबार करतकीर तीं गांवाची वाट धरतलीं आनी जें चल्ला ताचोय गोबोर करून वडयतलीं. आयज आमी शेतकामत्याक लुकसाण जालां हें पेपरांनी वाचतात, मागीर दोळे मुखार घडटलें.
वचपाक रस्तो नाशिल्ल्यान हें भांगर उरलां. दोंगर चडून वचप शक्य नाशिल्ल्यान थंय अटंगें रान जालां. शितळ वारो गांवान फिरता. थंडसाण मे म्हयन्या मेरेन उरता. भुरगेपणांत ह्या दोंगरांनी आमी हेडटाले. ती पाचवीचार भूंय असो कोण आपल्या पोटान लोटत हें केन्नाय चिंतलेंच ना. आतां पळयत तर दिसता आमकां आनी राकेसाची गरज ना. आमचे मदींच महिषासूर, रावण, नरकासुर आसात. तांकां केन्ना कांय सगलें इबाड करून, लोकांचे हाल जाल्ले पळोवंक जाय.
कोणाचें बरें जातलें?
फिल्म सिटी आयल्यार कोणाचें बरें जातलें? लोलयेंकारांचें? पैंगिणकारांचें? काणकोणकारांचें? कांय युपी- बिहार्यांचें? काणकोणांत कलाकार आसात, पूण फिल्म सिटीनीं जांचीं वळख आसा, जे फामाद कलाकार आसात तांकांच संद मेळटा. नवख्या, कलेची वा नाट्यशात्राची पदवी नाशिल्ल्यांक, अणभव नाशिल्ल्यांक हांगा संद मेळना. फिल्म सिटी म्हणलें कांय व्हडले- व्हडले करोडां रूपयांचे सेट आयले. ते पिओपीचे आसतात. आख्खो म्हयनो शूटींग जातकीर तो सेट निखळायलो कांय मातये भरवण जाता. डॅबरीस, जें घरां मोडल्यार जाता, तशें ह्या पिओपीचें जाता, ताचो परत कसल्याच कामाक उपेग नासता. ताची हे वाट कशी लायतले? एक सोनसडो हांकां मॅनेज करपाक जायना, ह्या विकत्या श्राद्दाक कोण पावतलो? गोंयात खाजगी नोकर्यो आसात, तातूंत काम करपाक आमीं लजतात, कांय तर सरकारी नोकरीच जाय म्हूण हट्टाक पेटतात, थंय आमीं स्पॉटबॉयचें, हेल्पराचें, सॅट असिस्टंटाचें काम करपाक तयार आसतले कांय? आनी दोनशीं- तीनशीं रूपयांच्या दिसवड्यार काम करतीत काय?
अणभवा बगर कुस्तार
अणभवा शिवाय कॅमरामन, लायटमन, डायरेक्टर, इपी, एडी, संगीतकार, बरोवपी आनी हेर बरे हुद्दे मेळप कुस्तार. आमी जे मेरेन हे शिकून तयार जातले तो मेरेन तेंप जावन गेल्लो आसतलो. मागीर ते अणभव आशिल्ले कोण? बंगाली, बिहारी, यूपी, महाराष्ट्र, केरळ, कर्नाटक, दिल्ली हांगासरले लोक. बरें ते आयल्यार आमकां लुकसाण कितें? ते पयलीं तुमच्या घरांनी भाड्यान रावतले, मागीर वर्सान आपलीं घरां बांदतले. मागीर तांचे वेवसाय, उद्देग, खाणां, तुमचे पसरे, हॉटेलां खातले. भाजी पावा जाग्यार तुमकां जिलबी पाव, वडा पाव, खाकरा, फाफडा, लिठ्ठी चोखा, दाल भाटी चुरमा असलें जगा वयलें खाण मेळटलें. रस्सा आमलेटी जाग्यार टुंडे कबाब मेळटले. रस्त्याकुशींक तुमकां हळशीक मेळटली. कोयर मेळटलो, प्लास्टिक मेळटलें. उदकाचें आतां परस चड हाल जातले. रिक्षा, टॅक्सी आयज आमच्यो आसात, फाल्यांय उरतल्यो, पूण पात्रांव ते आनी आमी कामाक रावतले. चोरयो मारयो, गुंडागिरी, लुबाडणूक मेळटली. बळजबर्यो वाडटल्यो. सोरो पिवन रस्तोभर राती- अपराती धुमशेणा घालपी तरणाटे दिसतले. पयलीं कांय वर्सां बोल्सांत पयसो घोळटलो, मागीर खंयच्या तरी युपी- बिहार्याल्या घरा मुखार सेक्युरीटी गार्ड म्हणून दिश्टी पडटलो. मागीर नजो जावन घरां सोडटलो. आशीकुशीक भयंकर झोपडपट्टी वाडटली. कारण तांकां एका रातीन सेट उबे करपी जाय आसतात. तांच्या बोल्सांत पन्नास रूपया चेपल्यार ते कितेंय करपाक शकतात. आमकां सरकारान थारयिल्लोच दिसवडो जाय. दिसवडो चड मेळपाक आमी एक दिसाचें काम धा दीस लागून करतात. रागार जावचें न्हय. हे सत आसा. ह्या कारणाक लागून आमकां कामां मेळप कमी जातलें. हांगा कितलोय बरो सेट केल्यार तुस्त, तोखणाय जायना. ताची आमकां संवय लावन घेवची पडटली.
गांवची जीण इबाडटली
फिल्म सिटींनी दीस रात कामां, शुटिंगां चलतात. गांवांनी साडेसात आठ म्हळ्यार दुकानां बंद करून, घरा जेवण जेवून ताणून दितात. हांगा राती तीन, साडे तीन मेरेन कामां चलतात. सकाळीं सात– साडेसात वरांर शिफ्ट लागता. केन्ना केन्ना पांचाची पासून आसता. आमी पावतले? हांगा शेनवार, आयतार बी कांय आसना. मदल्या दिसांनी सुटी आसता. केन्ना- केन्ना तर सेगीत म्हयने, म्हयने काम करचें पडटा. आमी भागोवन घेतले तर? कांय आडवाद सोडल्यार उरतल्यांचे किदें? चार दीस बरें चलतलें, मागीर म्हाका जमना म्हणून सोडटले. एकट्याच्या करणेन सगल्यांचेर शिक्को बसतलो….. आनी मागीर जें मुंबय चल्ला तेंच गोंयांत जातलें.
भोंवडेक आयिल्ले भोंवडेकार आमकां नाका जातात, हे सासणा खातीर हांगा येतले, तांका आमी खपोवन घेतले कांय किदें? थळावे लोक उणे जातकीर हांगासरलें दायज, रिती, परंपरा शेणटली. तें आमकां चलतले कांय? आनी एक गजाल म्हळ्यार, मुंबयंत ज्या जाग्यार फिल्म सिटी जाल्या त्या जाग्यार पयलीं अटंगें रान आशिल्लें, आतां थंय व्हड- व्हड इमारती, पांच नखेत्रांची हॉटेलां, खाणावळी जाल्यो दिश्टी पडटात. पान, गुटख्याच्यो टपर्यो, पसरे, चायेचें गाडे दिश्टी पडटात. त्या भायर त्या पानमसाल्याचीं, गुटख्याचीं पाकिटां जळा मळा पडिल्लीं दिश्टी पडटात. मुंबय सारक्या शारांत जंय नगरपालीका कोयराची येवजण बरी दवरता, थंय ही गत. मुदलांतूच कोयराची कशी वाट लावप खबर नाशिल्ल्यो आमच्यो ग्रामपंचायती, कोयराच्यो राशी कश्यो सांबाळटल्यो?
भायल्यान चकचकीत, भितर….
सगल्यांत भयंकर गजाल जिचो विचार जावपाक जाय ती म्हळ्यार शिंदळकी. एक काडून वडयली आनी नव्या भेसान दुसरीं हाडपाक सोदतात. ही दुनिया भायल्यान पळोवपाक चकचकीत आसता, भितर वतगीर कळटा कितें चल्ला तें. थळावो लोक ह्या झगमगाटाक भुलून, नोकरेच्या हावेसान ह्या राकेसाक जागो दित तर मुखावेल्या धा वर्सांनी पियेवपाच्यो उदकाक लेगीत आमी पातेशीर जातले. दोंगर वांचयल्यारच आमकां बांयतुत उदक दिसतलें, ना तर उदकाक लेगीत आमकां शेजारा कट्टी घेवन हे वसवशिल्ले राजकारणी भिकेक लायतले.
उदरगत करपाची आसत तर गोंयच्या तरणाट्याक शेतां भाटांची रूच लायात. शिक्षण दिवचेंच, पूण मद मारून पयशाच्या नेटार आपल्याच मुळार उठचें न्हय. काजू मळां, कुळागरां, तशेंच गोंयची खाशेलीं पिकावळ हांकां सरकारान तेंको दिवन तरणाट्यांक ह्या गजालींचें म्हत्व समजावचें. आसा तें इबाड करपाक कळाव लागचो ना, पूण चुकिल्लें पावल परत सारकें करता म्हणसर पिळगेची पिळगी सोंपिल्ली आसतली. आसा तातूंत समाधानी रावपी गोंयकाराक हे असले प्रोजॅक्ट दाखोवचे परस जें गोंयांत आसा ताचीच उदरगत करत आनी दायज राखत तरच गोंयकार गोंयांत उरतलो.
सारंग अग्रासनी
99218 68202
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
