भांगरभूंय | प्रतिनिधी
पेडणें नगराध्यक्षाची गवाय; तात्पुरतें आंदोलन स्थगीत
पेडणें: पालिकेचे हंगामी धा ते बारा कामगारांक तशेंच चार कायमस्वरुपी कामगारांक फाटल्या दोन आनी चार म्हयन्याचो पगार मेळूंक नाशिल्ल्याच्या निशेधार्थ पेडणें पालिकेच्या कर्मचारी कामगारांनी काल (मंगळारा) पालिके सामकार धरणें आंदोलन सुरू केल्लें.
गोमंतक मजूर संघा वतीन ह्या कर्मचाऱ्यांनी धरणें आंदोलनाक सुरवात केली. त्या वेळार संघटणेचे अध्यक्ष पुती गांवकार हांणी मुख्याधिकारी अनंत मलीक, नगराध्यक्ष सिद्धेश पेडणेंकार हांचे कडेन चर्चा करून तीन दिसां भितर पगार दिवपाचें आस्वासन तांणी दिलां. ताका लागून हें आंदोलन स्थगीत दवरपाचो निर्णय घेतिल्ल्याचें तांणी सांगलें.
तशेंच प्रॉव्हिडंट फंडा विशीं आपणें मुख्याधिकाऱ्या कडेन चर्चा करून योग्य तो निर्णय घेतले, आनी तांच्या फंडाचो जो निधी आसा तो निधी लेगीत हाचे पयलींच एका एजन्सी कडेन सुपूर्द केला. पूण ते एजन्सीन प्रॉव्हिडंट फंडांत तो निधी गुंतोवक नाशिल्ल्याचें सिद्धेश पेडणेंकार हांणी सांगून आपूणय हातूंत लक्ष घालतलों अशें आस्वासन दिलें.
ह्या कामगारांक गोवा फॉरवर्डाचे फुडारी दीपक कळंगूटकार हांणीय आपलो तेंको दिला. गोंयांत भाजपाचें सरकार आसा. थळावो आमदार भाजपाचो आसा. पालिका मंडळ भाजपाचें आसा. इतलें सगलें आसून लेगीत कामगारांक पगार मेळनाशिल्ले खातीर तांणी निरशेणी उक्तावन निशेध केलो.
सरकार वेगळ्यावेगळ्या माध्यमांतल्यान नितळसाण अभियान राबयता. एका दिसा खातीर सान्न घेवन नितळसाण करतात. पूण पालिकेचे कर्मचारी दर दिसा गटारांतली घाण, कोयर उबारतात. हे कामगार 365 दीस पालिकेचो वाठार नितळ दवरतात, आनी तांकां तांच्या हक्काचो पगार मेळनाशिल्ल्यान कळंगूटकार हांणी निरशेणी उक्तायली.
कामगारांनी आपले प्रस्न मांडटना आमी दीसभर व्हड कश्टान काम करतात. पूण चवथीक आमकां पगार मेळिल्लो ना. चवथ आमी लोकांच्या पयशांतल्यान केली. आयज पगार मेळटलो, फाल्यां मेळटलो हे आशेर आमी रावले. पूण कोणेच आमची दखल घेतली ना.
आनीक कांय कामगारांनी सांगलें, आमचे घरकार संवसाराक अंतरून चार वर्सां जाली पूण तांचे निवृत्ती वेतन वा तांचे पेन्शन, तांचो पगार आयज मेरेन आमकां मेळिल्लो ना. आमी आमची दीसपट्टी जीण कशी सारूं? हाचेर सरकारान लक्ष दिवन आमकां न्याय दिवचो अशी मागणी ह्या वेळार तांणी केली.
नगराध्यक्ष सिद्धेश पेडणेंकार हांणी सांगलें, कामगारांचे प्रस्न, कामगारांचो पगार तांकां वेळार दिवपाचो आमी यत्न करतात. पूण निधीचो उणाव आशिल्ल्यान फाटीं फुडें पगार जाता. पूण जो आडिल्लो पगार आसा तो आमी तीन दिसां भितर दितले अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
