भांगरभूंय | प्रतिनिधी
दिवचले भाजपा युवा मोर्चा वतीन निराधार भुरग्यांक दिलें नवें घर
दिवचल: भारतीय जनता पार्टीच्या कार्यकर्त्यांनी समाजीक बांदिलकी, भावपण, आपुलकी हीं नातीं जोडटना गरजू भुरग्यांचें, निराधार लोकांचें पालकत्व स्विकारून तांकां विवीध स्वरुपांत मजतीचो हात दिवप ही मोटी सेवा आसा. ते खातीर युवा मोर्चा सयत सगल्या घटकांनी सेगीत फुडाकार घेतना निराधार लोकांक विवीध पांवड्यार मजत करून समाजीक आपुलकी सांबाळची अशें आवाहन मुख्यमंत्री डॉ. प्रमोद सावंत हांणी केलें.
गांवकारवाडो दिवचलचे देवेंद्र आनी वैकूंठ राज ह्या भुरग्यांच्या बापायक मरण आयिल्ल्यान तांकां घर नाशिल्ल्यान तांकां आदार दिवपा खातीर भाजपा युवा मोर्चान मुख्यमंत्री डॉ. प्रमोद सावंत हांच्या वाडदिसा मांद्रेंकार भुरग्यांक सुसज्ज अशें घर उबारपाचो संकल्प केल्लो. हें सुंदर रितीन उबारिल्लें घर डॉ. सावंत हांचे हस्तुकीं मांद्रेंकार भुरग्यांचे सुवादीन केलें.
ह्या वेळार आमदार प्रेमेंद्र शेट, भाजप फुडारी दामू नायक, युवा मोर्चाचे समीर मांद्रेंकार, संकेत आर्सेकार, नगराध्यक्ष कुंदन फळारी, सतीश गांवकार, अनिकेत चणेकार, विश्वास गांवकार, दयानंद कारोटकार नगरसेवक बी मानेस्त हाजीर आशिल्ले.
देश पयलो हो भाजपाचो संकल्प. निमाण्या घटकां मेरेन मजत दितना समाजांतल्या वायट प्रवृत्तींक नश्ट करपा खातीर वेसना पसून पयस रावपा खातीर, लोकांनी तशेंच भाजप कार्यकर्त्यांनी प्रबोधन करचें. घरांत वेसनी मनीस आसत जाल्यार परिवाराक त्रास सोंसचे पडटात हाचें भान दवरचें अशें मुख्यमंत्री डॉ. प्रमोद सावंत हांणी म्हणलें.
युवा मोर्चान गोंयांत चार गरजू परिवारांक आसरो दिला हाचो खूब अभिमान आसा. प्रधानमंत्री नरेंद्र मोदी हांच्या सपनांतलो भारत घडयतना गरजेवंतांक मजत करप ही ईश्वराची सेवा आसा. हातूंत दरेकान वांटेकार जावचे अशें आवाहन मुख्यमंत्र्यांनी केलें.
ह्या वेळार कुटुंबांतल्या भुरग्यांच्या हातांत नव्या घराच्यो चाव्यो दितना मुख्यमंत्र्यांचें काळीज भरून आयलें. तांणी भुरग्यांक सगले तरेचें सहकार्य दिवपाची गवाय दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
