भांगरभूंय | प्रतिनिधी
पणजी, ज्ञानेश्वर वरक : पेडण्यां वाठारांतली १ कोटी ४४ लाख ७७ हजार ६८३ चौखण मिटर जमीन नव्या झोनींग प्लाना प्रमाण शेतकी जमनींतल्यान ‘सेटलमेंट झोन’ (निवासी विभाग) म्हणून रूपांतरीत केल्या. थळाव्यांक विश्वासांत घेनासतना सरकार आपल्याक जाय तशें जमनींचें रूपांतर करपाक लागिल्ल्यान पेडणेंच्या थळाव्यांनी तिडक उक्तायल्या.
मेळिल्ले म्हायती प्रमाण, पेडणेंची ४४,००,५५३, मांद्रेंची २१,९४,२१०, धारगळे १०,७३,९३३, वझरी ९,९३,८७१, मोरजे ८,३९,०८३, चोपड्यां ६,८५,०५६, हरमल ६,६५,५८२, कोरगांव ५,७७,०९९, पार्से ५,१७,२२२, कासारवर्णें ४,६४,२६३, चांदेल ३,९७,५९७, हळर्ण ३,७२,४३२, वारखंड ३,२०,३२७, तुयें २,८७,९७४, इब्रांपूर १,९७,१८७, विर्नोडा १,११,१४४, पेडणें १,०९,६९७, तोर्से ९६,११४, उगवें ७८,२२७, आगरवाडो ६५,११६ आनी मोपा ३०,९८७ आशी पुराय पेडण्यांच्या वीस गांवांच्या वाठारांतली ही एकूण १,४४,७७,६८३ चौखण मिटर जमीन ‘सेटलमेंट झोन’ जाल्या.
थळावे सांगतात ते प्रमाण, झोनींग प्लान करतना कोणाकूच विश्वासांत घेवंक ना. सरकार आपल्याक जाय तशें जमनीचे रंग बदलून मेकळें जालां. थळावे जे कितलींशींच वर्सां जालीं आपल्या जाग्यार घरां बांदून रावतात. तांकां जमनीचो झोन बदपाची संद लेगीत सरकारान दिवंक ना, अशे आरोप थळावे करतात. थळाव्यांनी गांवांगांवांनी बसका घेवन लोकांक समजावपाचो यत्न सुरू केला, अशी म्हायती थळावे उदय महाले हांणी दिल्या.
चिफ टावन प्लॅनर पेडणेंचे कचेरेंत सप्तकांतल्यान फकत दोन दीस येता. तो येता तेन्नाच प्लॅन पोळोवपाची संद थळाव्यांक मेळटा. तो खंय मात्सो प्लान दाखयता आनी रोखडोच कवळटा अशी कागाळ घेवन थळावे आमदार जीत आरोलकार हांचे कडेन पाविल्ले.
थळाव्यांक विश्वासांत घेवचें : जीत आरोलकार
झोनींग प्लान करतना थळाव्यांक विश्वासांत घेवपाक जाय आशिल्ले. पूण तशें जावंक ना. प्लान टॉप टु बॉटम केला, तसो करिनासतना बॉटम टु टॉप करचो आनी थळाव्यांक विश्वासांत घेवचें. लोक रावता त्या जाग्यां परस चड जाग्यांचें स्वरूप बदल्ल्यार गांव सोंपपाचो हुस्को मांद्रेंचे आमदार जीत आरोलकार हांणी उक्तायलो.
थळाव्यांचे प्रस्न मंत्री सोडयतले: प्रवीण आर्लेकार
पेडणें मतदार संघांतल्या सगल्या पंच, सरपंच, नगरसेवकांकडेन टिसीपी मंत्री विश्वजीत राणे हांणी तीन म्हयन्यां फाटी बसका घेतली. झोनींग प्लान ताका सजमायला. झोनींग प्लान आपल्या वठारांतल्या लोकांक सजमयात म्हणून मंत्र्यान सांगिल्लें. आतां थळाव्यांचे जे कितें प्रस्न आसा ते मंत्री सोडयतले अशें पेडणेंचे आमदार प्रवीण आर्लेकार हांणी म्हणलें.
कसिनो, थीम पार्काक लागून झोनींग प्लान: शेर्लेकार
सरकार पेडण्यां योवपी कसिनो, थीम पार्काच्या सकारात्मक विचारान झोनींग प्लान केला. तांकां जाय तितले व्हडले रस्ते करपा सारकी सुवात टीसीपी खात्यान झोन बदलून दिल्यात. सरकारान थळाव्यांचेर अन्याय करून भायल्यांची भर करता अशें समाज वावुरपी स्वप्नेश शेर्लेकार हांणी सांगलें.
पेडण्यांचेर सगल्या बिल्डरांचो दोळो
पेडण्यांचेर आतां सगल्या बिल्डरांचो दोळो आसा. मोपा उपरांत आतां खुबशे प्रकल्प पेडण्यां येवपाचे आसात. तांचो विचार करून सरकारान जमनीचे रंग बदलचे न्हय. थळाव्यांक राखपाक लागून सरकारान यत्न करचे अशें थळावे राजन कोरगांवकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
