भांगरभूंय | प्रतिनिधी
गोंय बायलां संगीत नाट्य सर्त ६ ते २७ डिसेंबराक
फोंडें, प्रतिनिधी: फोंडेंच्या राजीव गांधी कला मंदीर आयोजीत १५ वी अ. गों. बायलां फुगडी सर्तीची पयली फेरी २ ते १० नोव्हेंबराक घेतले. जाल्यार निमाणी फेरी १० नोव्हेंबराक जातली. राजीव गांधी कला मंदीर, फोंडें आयोजीत स. किशोरीताई हळदणकर स्मृती ९ वी अ. गों. बायलां संगीत नाट्य सर्त ६ ते २७ डिसेंबर मेरेन घेतले. इत्सूक पंगडांनी चड म्हायती खातीर कार्यलयांत संपर्क करचो अशी म्हायती कला मंदिराची वांगडी सचीव स्वाती दळवी, सुनील केरकार आनी किर्ती उमर्ये हांणी पत्रकार परिशदेंत दिली.
फुगडी सर्तींत गोंयच्या खंयच्याय बायलां पंगडाक निर्धारीत नमुन्यान प्रवेश अर्ज भरून हे सर्तींत वांटो घेवपाक मेळटलो. पयले फेरींत पयलो येवप्याक पयलो प्रवेश दितले. पयल्या १०० पंगडांक प्रवेश दितले. ता. ५ ते १६ ऑक्टोबर ह्या काळांत हे सर्ती खातीर अर्ज कला मंदीर, फोंडें, रवीन्द्र भवन- मडगांव, सांखळे, वास्को, कुडचडें हांगा उपलब्ध आसतले. अर्ज स्विकारपाची निमाणी १६ ऑक्टोबर मेरेन आसा. १०० रूपया शुल्क भरुन निर्धारीत नमुन्यांतले अर्ज १६ ऑक्टोबराक सांजेवेळार ४ वरां मेरेन राजीव गांधी कला मंदिराच्या फोंडेंच्या कार्यालयांत स्विकारतले. ही सर्त घेवपा खातीर सुमार ३० पंगड वांटेकार जावप गरजेचें.
बायलां संगीत नाट्य सर्त
बायलां संगीत नाट्य सर्तीच्यो प्रवेशिका कला मंदीर – फोंडें, कार्यालयांत १० ऑक्टोबर मेरेन उपलब्ध करतले. अंदूं पयलें येवप्याक पयलें प्राधान्य दिवपाच्या तत्वाचेर फकत १५ संस्थांक प्रवेश दितले. प्रवेशिका सविस्तर भरून १ नोव्हेंबराक सांजेवेळार ४ वरां मेरेन राजीव गांधी कला मंदीर कार्यालयांत पावोवप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
