भांगरभूंय | प्रतिनिधी
दोन म्हयने जाले उदक ना: हात-पांय धुनासतना खांवचें, जेवचें पडटा
मडगांव, प्रतिनिधी : मडगांवच्या सोनसडो कोयर प्रकल्पांतल्या कामगारांचे भलायकेचो प्रस्न सध्या मुखार आयला. फाटल्या दोन म्हयन्यां सावन हांगा उदक नाशिल्ल्यान केन्ना- केन्ना कोयर उखलिल्ल्या हातांनीच जेवचें पडटा, अशें हांगाच्या कामगारांनी सांगलें.
उच्च न्यायालयान साळगांवां आनी काकोडा प्रकल्पांत कोयर व्हरपाक सांगिल्ल्यान सध्या सोनसडो प्रकल्पाचेर ओल्या कोयराची रास उणी जाल्या. पूण, सांठोवन दवरिल्लो कोयर आजूनय थंयच आसा. पूण, सोनसडो कोयराच्या प्रस्नाचेर कांय काळा पुरतो हुस्को मेकळो जाला. पूण समस्या आजूनय सुटूंक ना. सोनसडो प्रकल्पांतलीं वीज बिलां फारीक करूंक नाशिल्ल्यान वीज कनेक्शन काडलां. ताका लागून उदकाचो पंप बंद पडला. हे गजालीक दोन म्हयने जाले तरी पालिका प्रशासनान हाचे कडेन आडनदर केल्या. नगरपालिका प्रशासनान दिल्लें कारण म्हणल्यार हीं उरिल्लीं वीज बिलां आदल्या कंत्राटदारांनी फारीक करूंक नात. ताका लागून सोनसाडो कोयर कारखान्यांत काम करपी दिसपट्ट्या मजुरांक आनी हेर कामगारांक उदक मेळना.
पालिकेन वीज बिलां भरूंक नाशिल्ल्यान पंपींग यंत्रणां बंद आसात. देखून सोनसडो प्रकल्पाचेर काम करपी २० ते ३० दिसपट्ट्या मजुरांक कोयराचेर प्रक्रिया करपा वांगडाच तो वेगळो करपा खातीर कोयर हाताळचो पडटा. केन्ना केन्ना शेजारच्या घरांनी वचून उदक मागचें पडटा. दर दिसा दुसर्यांच्या घरांतल्यान कितलें उदक घेतले? अशें म्हणत केन्ना केन्ना घाण हात- पांय धुवनासतनाच जेवण जेवचें आनी खावचें पडटा. ह्या विशयाचेर पालिकेन लक्ष दिवचें अशी मागणी कामगारांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
