भांगरभूंय | प्रतिनिधी
मुरगांव: 2 ऑक्टोबर महात्मा गांधी जयंती दिसा ‘ड्राय डे’ आसून लेगीत मुरगांव म्हाल अबकारी विभागान वास्को बायणा आनी हेर सुवातांनी धाडी घालून 92 लाख रुपयांचो सोरो जप्त केलो. मुरगांवचे अबकारी निरिक्षक मुकूंद गांवस हांच्या फुडारपणा खाला ही धाड घालून सोरो जप्त केलो.
2 ऑक्टोबराक महात्मा गांधी जयंती दिसा ‘ड्राय डे’ आसून लेगीत कांय लोक हेतेपुरस्सर सोरो विकतात. काल (सोमारा) बायणा वाठारांत गुप्ता जनरल स्टोर्साचेर मुरगांव अबकारी विभागान धाड घालून व्हड प्रमाणांत सोऱ्याच्यो बाटल्यो जप्त केल्यो.
अबकारी विभागाक बायणा वाठारांत एका जनरल स्टोर्साचेर सोऱ्याची विक्री जायत आशिल्ल्याची म्हायती मेळटकूच अबकारी निरिक्षक मुकूंद गांवस हांच्या फुडारपणा खाला अबकारी शिपाय विठोबा मालवणकार, रितेश तोरस्कार, देविदास तिरोडकार, दत्तप्रसाद कवठणकार हांणी धाड घालून सोरो जप्त केलो.
अबकारी निरिक्षक गांवस हांणी सांगलें, गांधी जयंती दिसा वास्को बरोबरूच हेर सुवातांनीय बेकायदो सोरो विकप्यांचेर धाड घालून अदमाशेक 92 लाख रुपयांचो सोरो ताब्यांत घेतला. हाचे पयलीं अबकारी निरिक्षक गांवस हांणी गांधी जयंती दिसा व्हड प्रमाणांत बेकायदो सोरो जप्त केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
