भांगरभूंय | प्रतिनिधी
बनावट आयडी सोदपाक 4 दीस तरी लागतले
पणजी : बनावट इन्स्टाग्राम आयडी तयार करून इस्लाम धर्माचेर टीका करपी पोस्ट घालपी मनशाक अटक जातलीच. ताचे आड गुन्यांव नोंद जातलो. देशांत तो खंयूय आसलो, तरी सुटचो ना. विदेशांत आसलो जाल्यार ताचे आड गुन्यांव नोंद जातलो. देशांत आयले उपरांत ताका अटक जातली, असो विस्वास मुख्यमंत्री डॉ. प्रमोद सावंत हांणी उक्तायला.
समाज माध्यमाचेर इस्लाम धर्मा आड पोस्ट घालून टिका केल्ल्यान शेनवारा राज्यांत बोवाळ जाल्लो. मुस्लीम बांधवांनी म्हापसा, पणजे, मडगाव पुलीस ठाण्याचेर मोर्चा व्हरून कारवाय करपाची मागणी केल्ली. हे संबंदी भाजपाचे म्हणयारे आनी हाज समितीचे अध्यक्ष उर्फान मुल्ला आनी हेर मुस्लीम भावांनी आयज मुख्यमंत्री डॉ. सावंत हांची भेट घेतली. सावंत हांणी बनावट इस्टाग्राम आयडी तयार करून टीका करतल्याआड खर कारवाय करपाचें आस्वासन दिलें.
बनावट इन्स्टाग्राम आयडी कोणें केली आनी कशी केली, ताचो सोद घेवपा खातीर चार पुलिसांचो पंगड तयार केला. सोद घेवपाक चार दीस तरी लागतले. इन्स्टाग्रामा कडेन उलोवणी सुरू आसात. देशांत तो खंयूय आसलो तरी ताका गोंयांत हाडून अटक करतले. ताचे आड गुन्याव नोंद जातलो. तो विदेशात आसलो जाल्यार आतांच अटक करप शक्य जावचे ना. तरी गुन्याव नोंद जातलो. देशांत येतकीच ताका अटक जातली. दुसऱ्या धर्माआड टीका करपी प्रकार सरकार सहन करचो ना, अशी शिटकावणी मुख्यमंत्री सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
