भांगरभूंय | प्रतिनिधी
थानाच्या कांक्राचे दुयेंती मेळटात वर्साक 300
पणजी : गोंयांत वर्साक कांक्राचे 1500 दुयेंती मेळटात. हातूंत परत थानाच्या कांक्राचे दुयेंती सगल्यांत चड म्हणल्यार 300 सुमार आसतात. बायलांकूच न्हय, जाल्यार दादल्यांक लेगीत थानाच्या कांक्राचे दुयेंस जाता. कांक्र दुयेंसाचेर उपचार जावन भलायकेंत सुदारणा जाल्ल्या दुयेंतींची परिशद जाली. हे परिशदेंत मानेस्तां कडल्यान ही म्हायती मेळ्ळी.
देशांत 1 लाख लोकां फाटल्यान कांक्राचे 100 दुयेंती मेळटात. गोंयांत लेगीत लागीं लागीं हेच प्रमाण आसा, अशें डॉ. शेखर साळकार हांणी सांगलें. गोंयांतले कांक्राचे दुयेंती ह्या ना त्या कारणाक लागून उपचारा खातीर केन्ना ना केन्ना मणिपाल हॉस्पिटलांत येतात. वर्साक जे 1500 दुयेंती मेळटात तातूंत थानाच्या कांक्राचे दुयेंती 300 आसतात. रगताच्या कांक्राचे 100, काळजाच्या कांक्राचे 150, तोंडाच्या कांक्राचे (ओरल कॅन्सर) 200, पॅनक्रीएटीक कांक्राचे 100, बरगड्यांच्या कांक्राचे (कोलोन कॅन्सर) 150 दुयेंती मेळटात. रगताच्या कांक्राचे (ब्लड कॅन्सर) 100 दुयेंती मेळटात. परिशदे विशीं म्हायती दितना नामनेचे ओनकोलोजिस्ट डॉ. शेखर साळकार हांणी ही म्हायती दिली.
दोना पावल हांगच्या इंटरनॅशनल सेंटरात चलपी ह्या परिशदेचे उक्तावण सुलक्षणा सावंत हांचे हस्तुकीं जालें. मुंबय, पुणे आनी गोंयचे दोतोर परिशदेंत वांटेकार जाल्यात. तशेंच गोंय आनी गोंया भायले उपचार घेवपी कांक्र दुयेंती परिशदेंत वांटेकार जाल्यात. धकाधकीच्या जिवितांत भलायकी कडेन आडनदर करप परवडपा सारखे ना. काम करपा सयत आहार आनी व्यायाम ह्यो गजाली जिवितांत म्हत्वाच्यो आसात. काम आनी विसव हांचे मदीं समतोल सादपाची गरज आसा, अशें सुलक्षणा सावंत हांणी सांगलें.
कांक्रा दुयेंसाचेर उपचार घेवन दुयेंसाचेर जैत मेळोवपी हाजीर आशिल्ल्या लोकांनी समाजा खातीर एक बरे उदाहरण घालून दिलां अशें टाटा मेमोरीयल हॉस्पिटलांतल्यो दोतोर डॉ. देविका भोजवानी हांणी सांगलें. कांक्र दुयेंतींचेर उपचार करतना तरेकवार अणभव येतात. ह्या अणभवांतल्यान शिकपाक मेळटा अशें मानाच्यो सोयऱ्यो डॉ. व्हिक्टोरिया चौगुले हांणी सांगलें. मुंबयचे अॅंकोलोजिस्ट डॉ. मंदार नाडकर्णी हांणी उपचार पद्दतीची म्हायती दिली.
कांक्र दुयेंसाचेर बेगीन उपचार जाले जाल्यार दुयेंती वाचपाची शक्यताय चड आसता अशें डॉ. शेखर साळकार हांणी आपल्या उलोवपांत सांगलें. हे परिशदेंत टाटा मेमोरियल हॉस्पिटल, कोकीळाबेन हॉस्पिटल तशेंच पुणेंच्या हॉस्पिटलांतले दोतोर वांटेकार जाल्यात. उपचार पद्दत तशेंच दुयेंतीनी घेवपाच्या जतनाये विशीं सादरीकरण जालें. आयतार आनी सोमार अशे दोन दीस परिशद चलतली. नाग फावंडेशन, गोकर्म अॅंकोलॉजी असोसिएशन आनी टाटा मेमोरियल हॉस्पिटल वुमेन्स इनिशिएटिव्ह हांणी परिशदेचें आयोजन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
