भांगरभूंय | प्रतिनिधी
दिल्लींतल्या कुटुंबांतले पांच जाण किरकोळ जखमी
म्हापशें: ओशेल, शिवोले आंब्याचें झाड रेंट अ कॅब मोटारीचेर पडलें. हातूंत दिल्लींतले पांच पर्यटक किरकोळ जखमी जावन सुदैवान वाटावले. जखमी भितर एका चार म्हयन्याचे चलयेचो आस्पाव आसा. हे पर्यटक दाबोळी विमानतळार वतना ही दुर्घटना घडली.
जखमी मदीं मोटार चालक लालेहर बीर सिंग (40), ताची घरकान्न प्रिया सिंग (36), धूव मीरा सिंग (5), भयण रीतू धाया (34) आनी भाची समीरा धाया (4 म्हयने) हांचो आस्पाव आसा.
दिल्ली वचपा खातीर दनपारां 3.30 वरांचेर तांचे विमान आशिल्लें. ताका लागून हे घडणुके उपरांत उपचारा खातीर हॉस्पिटलांत वचनासतना दुसऱ्या वाहनांतल्यान हें कुटूंब रोखडेंच दाबोळे विमानतळार गेलें.
जखमी कुटूंब पांच दिसां पयलीं दिल्ली सावन गोंयांत आयिल्लें. ते ओशेल शिवोले फॉर्च्यून कासा हॉटेलांत देंविल्लें.
ही घडणूक आयतारा दनपारां 2.15 वरांच्या सुमाराक क्षेत्रपाल देवळा कुशीक घडली. जखमी पर्यटक कुटूंब जीए 06 टी 6990 क्रमांकाची अर्टीगा रेन्ट अ कॅब मोटार घेवन दाबोळी विमानतळार दिल्लीक वचपा खातीर वतालें.
हॉटेला सावन अवघ्या कांय मिटराचेर पोरणें आंब्याचें झाड नेमकें तांच्या मोटारीचेर पडलें. ही घडणूक नदरेक येतकूच थळाव्या लोकांनी घडणूक थळार धांव घेवन मोटारींतल्या सगल्या पर्यटक प्रवाशांक भायर काडले.
झाड कोसळिल्ल्यान तीन वीज खांब आनी सुमार 200 मिटर मेरेनच्यो वीज वाहिन्यो तुटल्यो. हें आब्याचें झाड सुमार 100 वर्सा परस चड पोरणें आसा.
घडणुकेची म्हायती मेळटकूच म्हापशेंचे उजो पालोवपी दळाचे उपअधिकारी ज्ञानेश्वर सावंत हांच्या फुडारपणा खालचे जवान घडणूक थळार दाखल जाले आनी झाड कापपाचें काम हातांत घेतलें.
तशेंच थळावे सरपंच प्रवीण कोचरेकार, उपसरपंच रेशल हरमलकार हांणी घडणूक थळाक भेट दिली. येरादारी पुलीस निरिक्षक गौरीश परब हांच्या फुडारपणा खाला पुलिसांनी येरादारीचेर नियंत्रण मेळोवन येरादारी दुसऱ्या मार्गान वळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
