भांगरभूंय | प्रतिनिधी
मडगांव, प्रतिनिधी ः रेबीज हो जिवाक धोको आशिल्लें दुयेस. चाबिल्ल्या मनशाक वा सुण्याक मरण येवपाचो धोको शंबर टक्के आसता. सध्या गोंय राज्य रेबीज मुक्त आसा आनी मिशन रेबीज चालू उरल्यार हें येस तशेंच मुखार उरतलें अशें दक्षीण गोंयचे जिल्होधिकारी अश्विन चंद्रू हांणी सांगलें. तशेंच सगल्यांनी हे मोहिमेचो लाव घेवन आपल्या पाळीव सुण्यांक लस दिवची अशें आवाहन केलें.
मिशन रेबीज खाला दक्षीण गोंयची लसीकरण कार्यावळ शेनवारा सकाळीं मडगांवच्या होली स्पिरिट चर्ची लागसार सुरू जाली. ह्या वेळार जिल्होधिकारी चंद्रू हांचे वांगडा आमदार विजय सरदेसाय, दिगंबर कामत, डॉ. मुरुगन अप्पुपिल्लय आनी हेर लोक हाजीर आशिल्ले. ह्या संदर्भार आमदार कामत हांणी सांगलें, लसीकरणाची मोहीम जाले उपरांत 2018 पसून राज्यांत रेबीजाचो एकूय दुयेंती मेळूंक ना. मिशन रेबीज खाला सुण्यांक इंजेक्शन दिवन हें दुयेंस नियंत्रणांत हाडलां.
मिशन रेबीज हो सरकारान चालीक लायलो बरो उपक्रम. सत्तेर आसतना वाठारांतल्या 18 हजार सुण्यांक हे मोहिमेक लागून रेबीजाचीं इंजेक्शनां दिल्ली. रेबीज मुक्त जावप म्हणल्यार सगळें साध्य जालां अशें न्हय. रेबीजांतल्यान सुटका मेळोवपा खातीर शेजारच्या राज्यांनी अशे तरेची मिशन रेबीज जाय. नाजाल्यार खंयच्याय सुवातेर सावन परतून सुरू जावंक शकता. मडगांव आनी फातोर्डा वाठारांतल्या सुण्यां खातीर सोनसडो हांगाच्या एनजीओ कडल्यान कार्यावळी सुरू आसात. पालिकेन केल्लो प्रस्ताव जिल्लोधिकारी कडेन प्रलंबीत आसा आनी जिल्होधिकाऱ्यान बेगोबेग उल्लेख केल्ले संस्थेक सुवात, प्रेरणादायी आनी हेर गरजेचो आदार दिवचो अशें आमदार विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
