भांगरभूंय | प्रतिनिधी
गजानन जोग हांच्या साहित्य कार्यावळींत मुकेश थळीचें सांगणें
म्हापशेंः कोंकणी कथाकार सर्गेस्त गजानन जोग हांच्यो कांय कथा अभिजात पांवड्याच्यो आसात आनी भारतीय साहित्य गिरेस्त करपी आसात अशें नामनेचे साहित्यीक मुकेश थळी हांणी सांगलें.
साहित्य अकादेमीन , बार्देस कोंकणी अस्मिताय केंद्राच्या जोड पालवान साहित्य अकादेमी पुरस्कार फावो जाल्ले कथाकार सर्गेस्त गजानन जोग हांची जीण आनी साहित्याचेर थळी हांच्या व्याख्यानाची कार्यावळ काल म्हापश्यां आयोजीत केल्ली. ही कार्यावळ सारस्वत विद्यालय कॉलेज ऑडिटोरीयम, खोर्ली, म्हापशें हांगा जाली.
बालकामगार पद्दत, जाण्ट्या लोकांचे प्रस्न, तरणाट्यांचे प्रस्न, अहंकाराचो कैफ जडिल्ल्या कलाकारांचें जावपी पतन, मनशाक पयशांचो आनी भौतिकतेचो जडिल्लो लोभ आनी तातूंतल्यान जावपी पतन अशा वेगळ्यावेगळ्या विशयांचेर जोग हांणी प्रभावी कथा बरयल्यो अशें थळी हांणी सांगलें. जोग हांच्या शैलीची वळख करून दितना तांणी जायत्यो देखी दिवन स्पश्टता दिली. तांच्यो कांय कथा टेलिफिल्म वा एकांकी वा रेडीओ प्ले हातूंत रुपांतरीत करपा सारक्यो आसात अशें तांणी सांगलें.
जोग हांणी रूद्र, सोद, खांद आनी हेर कथा हे कथांझेले तशेंच गोपी आनी वर्स फुकट वचूंक ना ह्यो बालनवलिका बरयल्यात तांतूतलें सौंदर्य आपले खाशेले शैलींत मुकेश थळी हांणी सांगलें. झबाझब, क्रुझालो पाय आनी व्हेरा ह्यो कथा आपणे इंग्लीशींत अणकारीत केल्यो अशें सांगतना मूळ कथा कोंकणी ग्रामीण मातयेच्या वासान कितल्यो थपथपिल्ल्यो आसात ताचेर थळी हांणी उजवाड घालो. गजानन जोग हांकां संवांदाचेर प्रभुत्व आशिल्लें आनी तांच्या कितल्याशाच कथांनी संवांदांची ही घट्ट वीण दिसून येता. खंयचे कडेन कांय ना, हें तांचें विनोदी नाटक गोंयच्या खांची कोंयड्यांनी वेवसायीक माचयेर गाजलें अशें थळी हाणी मुखार सांगलें.
पास्त ह्या तांच्या विनोदी शैलींतल्या निबंद झेल्यांतले पास्त आनी पातळ भाजी हे निबंद खुबूच उंचा पांवड्याचे आनी हांसोवन मुड्डो करपी तांकीचे विनोदी आसात अशें ताणी म्हणलें.
टार्गेट हे जोगांचे कथेंत मंगळूरी कोंकणीचे सणसणीत संवाद आसात, मंगळूरी पात्रां आसात अशें तांणी सांगलें. मैफल हे कथेंत कलाकार आपणाक कले परस वा जिणे परस व्हड समजून अहंकारान मातता तेन्ना कला ताचो माज कसो जिरयता तो सुंदर संदेश दिला अशें मुकेश थळी हांणी सांगलें.
शशिकांत पुनाजी हांणी प्रास्ताविक केलें. कुसुम अगरवाल हांणी येवकार दिलो. सोनाली चोडणकार हांणी थळी हांची वळख करून दिली. अनघा कामत हांणी उपकार मानले. नूतन साखरदांडे हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
