भांगरभूंय | प्रतिनिधी
म्हामार्गार कोसळ्ळें पालसण; येरादारीक आडखळ
म्हापशें: सेगीत पडपी पावसाक लागून बार्देस म्हालांतली लोकजीण विस्कळीत जाली. कांय सुवातांनी पडझड जाली. घरां आनी मोटारींचेर झाडां पडून सुमार 4.20 लाखांचें लुकसाण जालें.
बिरेस्तारा रातीं सावन पडपी पावसान शुक्रारा नेट धरलो. कांय कडेन वादळी वाऱ्या सयत पावस पडलो. हाका लागून बार्देस म्हालांतल्या कांय वाठारांनी झाडां पडलीं. दत्तवाडी म्हापश्यां सिरसाट इमारती कुशीक पार्क केल्ले मोटारीचेर झाड पडलें. हातूंत चार मोटारींची मोडतोड जाली. हाका लागून सुमार 80 हजारांचें लुकसाण जालें. ही घडणूक सकाळीं 6.15 वरांच्या सुमाराक घडली.
दनपारां आल्तीन, म्हापश्यां एल कापितान इमारती कुशीक जोशी हांच्या घरांचेर झाड पडलें. घराचे फाटले वटनेचें आनी मुखा वेले वटेन आशिल्लीं तिनूय झाडां हीं नेमकीं घराचेर पडलीं. हाका लागून अर्दें घर पडलें. ह्या वेळार घरांत कोणूच नाशिल्लीं म्हूण सुदैवान तीं वाटावलीं. हे दुर्घटणेंत सुमार दोन लाखांचें लुकसाण जालां. जाल्यार उजो पालोवपी दळाच्या जवानांनी पांच लाखांची मालमत्ता वाटायल्या.
शापोरा वाठारांत सांजवेळा अजीत कामत हांच्या घराचेर माड पडून किरकोळ लुकसाण जालें. जाल्यार चोघम रस्तो पर्वरे आल्तो मोटारीचेर झाड पडून सुमार 1.40 लाखाचें लुकसाण जालें.
तशेंच एकोशी, हणजूण, शापोरा, शिवोली हांगा वीज वाहिनी आनी रस्त्यांचेर झाडां पडून येरादारी ठप्प जाली आनी वीज पुरवण खंडीत जाली.
तशेंच सांजवेळा उसरां करासवाडो, म्हापश्यां पेत्रोल पंपा कुशीक राष्ट्रीय म्हामार्गा कुशीचें पालसण कोसळ्ळें. व्हड फातर म्हामार्गार आयले. हाका लागून येरादारीक आडमेळीं निर्माण जाली. उजो पालोवपी दळाच्या जवानांनी हीं पालसणां कुशीक काडून म्हामार्ग मेकळो केलो.
म्हापशें उजो पालोवपी दळाचे अधिकारी अशोक परब आनी पर्वरेचे अधिकारी दामोदर पेडणेंकार हांच्या फुडारपणा खाला उपअधिकारी ज्ञानेश्वर सावंत, प्रकाश कान्नायक, मुकूंद गवंडी आनी वांगडी जवानांनी पडिल्लीं झाडां कापून कुशीक काडलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
