भांगरभूंय | प्रतिनिधी
मडगांव, प्रतिनिधी : सांकवाळ चर्च वाठारांत देवीची मूर्त स्थापन करपाच्या प्रकरणांत दुबावीत कालिदास वायंगणकार आनी संतोष राजपूत हांच्या अटकपूर्व जामिनाचेर शुक्रारा दक्षिण गोंय जिल्लो न्यायालयांत सुनावणी जाली. दोनूय दुबावितांक सशर्त जामीन मेळ्ळा.
सांकवाळातल्या संरक्षित सुवातेर विजयदुर्गा देवीची स्थापणूक केल्ल्या प्रकरणांत वेर्णा पुलिसांनी आठ अनवळखी व्यक्तीं सयत धा जाणां आड गुन्यांव नोंद केल्लो. स्थापन केल्ली मूर्त पुलिसांनी ताब्यांत घेतल्या आनी बांदकाम मोडून उडयले. संरक्षित सुवातेर देवीची स्थापणूक करपाक वावुरपी लोकांक अटक करपाची मागणी चर्चीचे फादर आनी थळाव्या लोकांनी केल्ली. ह्या प्रकरणांतले दुबावीत वायंगणकार आनी राजपूत हांणी दक्षीण गोंय जिल्लो न्यायालयांत अटकपूर्व जामीनाचो अर्ज सादर केल्लो. ताचेर शुक्रारा सुनावणी जाली. हाचे आदीं सुनावणी वेळार पुलिसांनी अहवाल सादर केल्लो. पुलिस चवकशी करतात तांतूत पुराय सहकार दितले अशें दुबावीतांनी सांगिल्ले. चर्च कडल्यान दाखल केल्ल्या हस्तक्षेप अर्जाचेर वाद सोंपल्यात. ह्या प्रकरणांत दोगांय दुबावितांक अटक करपाचो वेळ आयल्यार 50 हजारांचें वैयक्तीक बॉण्ड आनी त्याच रकमेच्या हमीदाराचेर जामीन मंजूर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
