भांगरभूंय | प्रतिनिधी
पणजी, प्रतिनिधी : वेलनेस पर्यटन, आध्यात्मिक पर्यटनाक उर्बा दिवन गोंय राज्याक आध्यात्मिक थळ करपाचे येत्न आसात. महिन्या भितर स्पिरीच्युअल सर्किटाची घोशणा जातली, अशें पर्यटन मंत्री रोहन खंवटे हांणी सांगलें. पर्यटन उच्चाधिकार समितीची बसका जाली. बसके उपरांत निर्णयांची म्हायती तांणी दिली.
बसकेंत टेम्पल कनेक्ट येवजणेचेर चर्चा जाली. दर्यदेगो सोडून हेर पर्यटन थळांची उदरगत जावपाची गरज आसा. देवळां, वेलनेस केंद्र हांच्या माध्यमांतल्यान आध्यात्मिक पर्यटनाक उर्बा दिवपाचे येत्न आसात. अंदू शिवजयंती उत्सव व्हडा दबाज्यान मनयतले. मुखेल कार्यावळी सयत हेर शारांनीय कार्यावळी जातल्यो. फर्मागुडी किल्लो वाठार विकसित करपा सयत संग्रहालय उबारपाचो प्रस्ताव आसा. टेम्पल कनेक्ट येवजने खाला कार्यावळी जातल्यो.
आजादी का अमृत महोत्सव निमतान राज्यांत 75 युवा क्लबांची स्थापना जातली. या क्लबा मार्फत कार्यावळी जातल्यो. अयोध्येत 23 जानेवारी 2024 दिसा राम मंदिराचें उक्तावण जातलें. राम मंदिर उक्तावणा निमतान राज्यांत कार्यावळी जातल्यो. हाचो लाव राज्याच्या पर्यटनाक जातलो. अंदुं पसून आयर्न मॅन कार्यावळ जातली. हे कार्यावळीचें ब्रॅण्डिंग जातलें, अशें पर्यटन मंत्री रोहन खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
