भांगरभूंय | प्रतिनिधी
पणजी, प्रतिनिधी ः सरकारांतल्या तीन बायलां आमदारांक आमी मंत्रीपदां दिवंक शकनात. कारण दोगांचे घोव मंत्रीमंडळांत आसात. एकाच कुटुंबांतल्या दोगांक मंत्रीपद दिवंक मेळना, अशें बुधवारा भाजपा कार्यालयांत घेतिल्ले पत्रकार परिशदेंत खासदार सदानंद शेट तानावडे हांणी सांगलें. ह्या वेळार आमदार जेनिफर मोन्सेरात, आमदार देवया राणे, आमदार डिलायला लोबो आनी सावड्डेंचे आमदार गणेश गांवकार हाजीर आशिल्ले.
केंद्र सरकारान 18 ते 22 सप्टेंबर मेरेन पांच दीस संसदेचें खाशेलें अधिवेशन आयोजीत केल्ले. 18 तारखेक संसदेचें काम नवे इमारतींत स्थलांतरीत केले. पोरण्या संसद भवनांत सगळ्या खासदारांचें फोटोसेशन जालें. दुसऱ्या दिसा लोकसभेंत बायलांचें आरक्षण विधेयक मांडलें. ह्या विधेयकाक मान्यताय मेळ्ळे उपरांत दुसऱ्या दिसा राज्यसभेंत ह्या विधेयकाक मान्यताय मेळ्ळी, अशी म्हायती तानावडे हांणी दिली. काँग्रेस जें केन्नाच करपाक शकली ना तें भाजपान केलें. हें विधेयक पयलेच खेपे काँग्रेसीन मांडलें अशें म्हण्टात, पूण ताका मात्तूय अर्थ ना. कारण, इतलीं वर्सां ताका मान्यताय मेळ्ळी ना. ते खातीर, योग्य वेळार योग्य निर्णय घेवपी पक्ष सत्तेर आसपाक जाय. भाजपान ते करुन दाखयलें अशेंय तानावडे हांणी सांगलें.
मजगतीं, भाजपा सरकारान बायलांक सशक्त करपा खातीर जायत्यो येवजण्यो चालीक लायल्यो. तांकां बरो प्रतिसाद मेळ्ळा. आतां राजकारणांतय आमी बायलांक सशक्त करतले. गोंय विधानसभेंत भाजपाच्यो तीन बायलां आमदार आसात. तांका मंत्रीपद कित्याक दिवंक ना अशें पत्रकारांनी विचारलें तेन्ना तानावडे हांणी पक्षाची भुमिका स्पश्ट केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
