भांगरभूंय | प्रतिनिधी
एक्सपायरी डेटीचें चिप्स पाकीट दिल्ल्याचें कारण
म्हापशें: तारीख सोंपिल्लें चिप्साचें पाकीट दिल्ल्याच्या कारणा वयल्यान सिरसय थिवी रेल्वे स्टेशन प्राकारांतल्या दुकानांत घुसून दुकान कर्मचाऱ्यांक मारपेट करपाची घडणूक घडली. ह्या प्रकरणांत कोलवाळ पुलिसांनी एकामेकां आड गुन्यांव दाखल केला.
ही घडणूक बुधवारा रातीं 1.30 वरांच्या सुमाराक घडली. थियेचे दुबावीत शिवरम परब, विघ्नेश च्यारी आनी हेर 4-5 जाणांचो गट सात दिसांच्या गणपती विसर्जना उपरांत थिवी रेल्वे स्टेशनार गेल्ले.
रेल्वे स्टेशनाच्या प्रकारांतल्या शिवप्रसाद सिंग हांच्या दुकानांतल्यान दुबावितांनी चिप्साचें पाकीट खरेदी केलें. हें खरेदी केल्ल्या पाकिटाची खावपाचे मुजतीची तारीख सोंपिल्ल्याचें (एक्सपायरी डेट) तांकां दिसून आयलें. तांणी हाची जाप दुकानांत येवन दुकान धनयाक आनी कामगाराक विचारली. तेन्नाच तांचे मदीं बाचाबाची जाली आनी प्रकरण गाळी संवप आनी मारपेटीचेर आयलें.
दुबावितांचो गट दुकानांत कामगारांक मारपा खातीर घुसलो. त्या वेळार दुकानांत तीग जाण आशिल्ले. तातूंतल्या एकल्यान दांडो घेवन प्रतिहल्लो केलो. पूण दुबावितांनी ताका धरून येथिश्ट बडयलो. तशेंच हेरांकूय कवचेच्यो बाटल्यो आनी हेर साहित्य घेवन मारपेट केली. हे मारपेटींत दोनूय वटेनचे लोक जखमी जाले.
ह्या प्रकरणांत कोलवाळ पुलिसांनी थियेंतल्या दुबावीत रहिवाशां आड भादंसंच्या 504, 324, 506(2), 427 आनी 149 कलमा खाला जाल्यार दुकान धनी आनी कर्मचाऱ्यां आड भादंसंच्या 504, 324 आनी 34 कलमा खाला एकामेका आड गुन्यांव दाखल केला.
मजगतीं, दुबावितां कडल्यान परतून असो अनुचीत प्रकरण घडचो न्हय हे खातीर पुलिसांनी दोनूय वटेनच्या दुबावितां आडचो अहवाल बार्देस जिल्होधिकाऱ्या कडेन सादर केला.
फुडलो तपास पुलीस उपअधिक्षक जिवबा दळवी आनी निरिक्षक विजय राणे देसाय हांच्या मार्गदर्शना खाला उपनिरिक्षक भरत खरत आनी हवालदार सीताराम चोडणकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
