नावेले झाडाचो खांदो पडून आवयक मरण, जखमी चलयेचेर उपचार सुरु
भांगरभूंय | प्रतिनिधी
चलयेक कॉलेजीक सोडपाक वतना दुर्घटना
मडगांव, प्रतिनिधी ः मडगांव- नावेले चर्ची लागसार मंगळारा सकाळीं रस्त्यार झाडाचो खांदो पडून ओडिलिआ सिल्वा मास्कारेन्हास हे बायलेक मरण आयलें. जाल्यार तिची चली लथिशा जखमी जाली. तिचेर हॉस्पिटलांत उपचार चालू आसा. तिका कॉलेजीक सोडपाक ती स्कूटरी वयल्यान वताली, तेन्ना ही दुर्घटना घडली.
मेळिल्ले म्हायती प्रमाण, नावेले जंक्शना लागसार उडपी हॉटेल सुरक्षा मुखार हायवेचेर झाडाचो खांदो पडलो. येरादारी आडकल्ल्यान नावेले जंक्शना लागसार तिणे आपली स्कुटर थांबयली. कांय वेळा उपरांत येरादारी सुरु जातकच स्कुटर फुडें व्हरतना रस्त्या कुशीक आशिल्ल्या झाडाचो खांदो मोडून तांचेर पडलो. आनी दोगाय जखमी जाली. हॉस्पिटलांत व्हरतना बायलेक मरण आयलें जाल्यार चली जखमी आसा.
एम्ब्युलन्स अर्द वर उसरां
ही घडणूक घडले बरोबर हाजीर आशिल्ल्या लोकांनी पुलिसांक आनी एम्ब्युलन्सीक फोन केलो. पुलिस त्या सुवातेर पावले, पूण येरादारीची कोंयडी जाल्ल्यान एम्ब्युलन्स उसरां पावली. तो मेरेन नावेले भलायकी केंद्रांतले वैजकी अधिकारी थंय आयले, पूण बायलेक गंभीर जखमी जाल्ल्यान हॉस्पिटलांत व्हरचें पडटलें अशें सांगले.
हायवे वयलीं धोक्याची झाडां कापपाची मागणी
नावेलींतले हे दुर्घटने उपरांत हायवेचेर आशिल्ल्या धोक्याच्या झाडांची तपासणी करून तीं कापून उडोवपाची मागणी नागरिक आनी चालकांनी केल्या. गोंयभर बऱ्याच रस्त्यांचेर धोकादायक स्थितींत झाडां आसात. थळाव्या पंचायती, पालिकांनी तीं कापपा खातीर फुडाकार घेवपाक जाय, अशें कांय चालकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
