भांगरभूंय | प्रतिनिधी
बागा-हडफडें अॅलन डिसोझा खून प्रकरण
म्हापशें: बागा-हडफड्यां अॅलन डिसोझा (28, रा. आसगांव) ह्या तरणाट्याच्या खून प्रकरणांतलो मुखेल दुबावीत आरोपी प्रमोद उर्फ बाबू खोर्जुंवेंकार (रा. तांबुडकी हडफडें) हाका मरण आयलें. हाका लागून दुसरो दुबावीत शिरीश नागेश गोवेकार (रा. सिमवाडो हडफडें) हाचे आड पुरावे नश्ट करपा सयत गुन्यांवकाराक वाटावपाचो यत्न केल्ल्याच्या गुन्यांवा खाला आरोप निश्चीत करपाचो आदेश अतिरिक्त सत्र न्यायालयान दिला.
हो खुनाचो प्रकार बिरेस्तार 25 ऑगस्ट 2023 दिसा घडिल्लो. बागा-हडफड्यां एका जॅम्सन रॅस्टोरंण्टा कुशीक मयत अॅलन हाची कूड हणजूण पुलिसांक सांपडिल्ली. कांदोळे भलायकी केंद्राच्या दोतोरांनी ताका मरण आयिल्ल्याचें जाहीर केल्लें. त्या वेळार पुलिसांनी असैमीक मरण म्हूण हें प्रकरण नोंद केल्लें. दुसऱ्या दिसा 26 वेर मरणा उपरांतचे तपासणे उपरांतूय मरणाचें कारण राखून दवरिल्लें.
पूण मयत अॅलन डिसोझा हाचो बापूय आंतोनिओ डिसोझा हांणी 28 वेर हणजूण पुलिशेंत कागाळ दाखल करून आपल्या चल्याच्या मरणा फाटल्यान घातपाताचो दुबाव उक्तायिल्लो. मयताचे इश्ट इम्रान खान, फॅबीन गोवर, नोएल डिसोझा आनी प्रमोद उर्फ बाबू हांचेर तांणी खुनाचो आरोप केल्लो.
घडणुके दिसा आपलो मयत पूत सांजवेळा 4.50 वरांच्या सुमाराक आपल्याक कांदोळे वयर दिल्ल्या इश्टांक मेळपा खातीर वचत आशिल्ल्याचें सांगून वेर्ला काणका सावन बुलेट मोटारसायकलीन गेल्लो. पूण तो रातीं 9 मेरेन घरा येवंक नाशिल्लो. उपरांत रातच्या 10.30 वरांच्या सुमाराक हणजूण पुलिसांनी मयताच्या कुटुंबाक फोन करून अॅलन हाचो अपघात जाल्ल्याचें सांगलें.
उपरांत आमी कांदोळे भलायकी केंद्रांत गेले तेन्ना थंय आमकां चल्याक मरण आयिल्ल्याचें सांगलें. तशेंच घडणूक थळा वयल्यान सुमार 200 मिटराचेर आपल्या चल्याची बुलेट मोटारसायकल पार्क आशिल्ली आनी तिका कसलोच अपघात जावंक नाशिल्ल्याचें दिसून आयलें. ताका लागून आपल्या पुताचो खून करून उपरांत घडणूक थळार हाडून उडयिल्ल्याचो दावोय डिसोझा हांणी केल्लो.
ते प्रमाण पुलिसांनी वयल्या दुबावितां आड भादंसंच्या 302 कलमा खाला गुन्यांव नोंद केलो. उपरांत दुबावीत प्रमोद उर्फ बाबू खोर्जुंवेंकार आनी शिरीश गोवेकार ह्या दोगांक अटक केल्ली. पुलीस तपासांत मयत अॅलन हो तांबुडकी हडफड्यां दुबावीत बाबू खोर्जुंवेंकार हाच्या घराच्या व्हरांड्यांत बेशुद्धावस्थेंत पडिल्लो.
ताका तेच स्थितींत दुचाकी वयल्यान व्हरतना मयताचो तोल वचून तो घडणूक थळार पडिल्लो. उपरांत दोनूय दुबावितांनी ताका थंयच उडोवन पळ काडिल्लो. मयताची कूड घडणूक थळा वयल्यान हेर कडेन व्हरून उडोवपा खातीर मुखेल दुबावीत खोर्जुंवेंकार हाका दुबावीत गोवेकार हाणें मजत केल्ली.
पूण दुबावीत बाबू खोर्जुंकार हाका मरण आयलां. ताका लागून ताचे आडचो खटलो रद्दबातल जाला. जाल्यार मयत खोर्जुंवेंकार हाका पुरावे नश्ट करपा खातीर मजत केल्ल्याच्या आरोपा खाला शिरीश गोवेकार हाचे आड भादंसंच्या 201 कलमा खाला आरोप निश्चीत करपाचो आदेश पणजेंतल्या अतिरिक्त जिल्हो सत्र न्यायालयाचे न्यायाधीश एडगर फर्नांडीस हांणी दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
