भांगरभूंय | प्रतिनिधी
पणजीः 4 – 5 नोव्हेंबर 2023 दिसा मंगळूर शारांतल्या विश्व कोंकणी केंद्रांत जावपी 25 व्या अखील भारतीय कोंकणी साहित्य संमेलनाच्या कचेरेचें बेंदूरवेल, मंगळूर हांगच्या कुनील संकुलांत विश्व कोंकणी केंद्राचे अध्यक्ष नंदगोपाल शेनॉय हांचे हस्तुकीं उक्तावण जालें.
ह्या वेळार पालक संस्था अखील भारतीय कोंकणी परिशदेचे कार्याध्यक्ष चेतन आचार्य, साहित्य अकादेमी पुरस्कार जैतिवंत गोकुलदास प्रभु, नामनेचे काळजा दुयेंस तज्ञ आनी कर्नाटकाच्या शाळांनी कोंकणी शिक्षणाचे आद्यप्रवर्तक आनी संयोजक डॉ के मोहन पै, नवी दिल्लीच्या साहित्य अकादेमीच्या कोंकणी सल्लागार मंडळाचो निमंत्रक आनी परिशदेचे उपाध्यक्ष मेलवीन रॉड्रिगीस आनी कवी, विचारवंत, राहूल जायरातदारांचे टायटस नोरोन्हा हाजीर आशिल्ले.
येवकार समिती आनी हेर उपसमिती तयार करपा खातीर चर्चा सुरू करतना पालक संघटणेचे अखील भारतीय कोंकणी परिशदेचे कार्याध्यक्ष चेतन आचार्य हांणी अखील भारतीय कोंकणी परिशदेचो इतिहास, अखील भारतीय साहित्य संमेलनाची नदर आनी व्याप्ती तशेंच कोंकणी भाशेचो संघर्श आनी कोंकणी भाशेच्या विकासांत लेखक आनी वावुरप्यां मुखार आशिल्लीं आव्हानां हांचे विशीं म्हायती दिली.
साहित्य अकादेमीच्या कार्यकारी मंडळाचे कोंकणीचे निमंत्रक कवी मेलवीन रोड्रिग्स हांणी सगल्या कोंकणी संघटणांक आनी व्यक्तींक परिशद आनी विश्व कोंकणी केंद्रा वांगडा हात मेळोवन अखील भारतीय साहित्य संमेलनाची एक भव्य कार्यावळ करपाचो उलो मारलो. अंदूं अखील भारतीय कोंकणी परिशद संमेलनाचो रुप्या महोत्सव मनयता.
वर्ल्ड कोंकणी केंद्राचे सीईओ गुरुदत्त बंटवालकर, सेंट आलोयसियस कॉलेजीचे कोंकणीचे मुखेली प्रा. फ्लोरा कास्टेलिनो, एंकर सुचित्रा शेणय, प्राध्यापक वेंकटेश नायक, राखणो कोंकणी साप्ताहिकाचे फादर रुपेश माडथा, उजवाड कोंकणी पंदराळ्याचे फादर आल्वीन कार्मेलायट, फ्लॉयड कोंकणी नाटक सभेचे कासिया आनी जेराल्ड कॉन्सेसो, आकार इनोव्हेशन्स, साहित्याचे दया व्हिक्टर लोबो, विन्सेंट पिंटो आंजेलोर हांणी आपले विचार मांडले.
साहित्य अकादेमीच्या कोंकणी भास सल्लागार मंडळाचे वांगडी एच. एम. पेर्नाल हांणी ह्या मेळाव्याक येवकार दिलो आनी चर्चेचें संचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
