भांगरभूंय | प्रतिनिधी
पोरूं परस अंदूं फकत तीन अपघात उणे
मडगांवां, प्रतिनिधी : दक्षीण गोंयच्या अपघातांचो आंकडो पोरूं इतलोच उरिल्ल्याचें दिसून येता. दक्षीण गोंयच्या विवीध पुलीस स्टेशनांच्या वाठारांत जानेवारी सावन आतां मेरेनच्या आठ म्हयन्याच्या काळांत वट्ट 163 अपघात जाल्यात. हांतल्या 66 अपघातांत वाहनां वयल्या प्रवास करप्यांक मरण आयलां.
दक्षीण गोंयांत जाल्ल्या अपघातांची म्हायती घेतली तेन्ना फाटल्या वर्साचे तुळेंत अंदूं तितलेच अपघात जाल्ल्याचें कळून आयलां. 2022 त जानेवारी सावन ऑगस्ट मेरेन ह्या आठ म्हयन्यांच्या काळांत 163 अपघात जाल्ले. 61 अपघातांनी वाहन चालक वा फाटल्यान बशिल्ल्याक मरण आयिल्ल्याच्यो घडणुको घडिल्ल्यो. तांतल्या 58 अपघांत मरण आयिल्ल्या प्रकरणांचो तपास पुराय जाला. हेर 104 अपघात जाल्ले आनी तांतल्या 101 अपघातांतल्या दोशींचेर कारवाय करपाक दक्षीण गोंय पुलिसांक येस आयलां.
2023 त जानेवारी सावन ऑगस्ट मेरेन वट्ट 163 अपघात जाल्ले. तांतलीं 66 प्रकरणांत मरण आयलां. 65 प्रकरणांतल्या अपघातांक कारण थारिल्ल्या व्यक्तींचेर कारवाय जाल्या. जाल्यार हेर 97 अपघात घडल्यात. तांतल्या 96 अपघातांतल्या दुबावितांचेर कारवाय जाल्या. अपघातांत मरण आयिल्ल्या प्रकरणांतल्या दुबावितांचेर कारवायेची टक्केवारी अंदूं वाडल्या. पोरूं 95 टक्के प्रकरणांचो तपास पुराय जाल्लो. अंदूं ही टक्केवारी 98 टक्क्यांचेर आयल्या. पोरूं परस अंदूं फकत तीन अपघात उणे जाल्यात तरी अपघातांत मरण येवपी प्रकरणांनी वाड जाल्या.
अपघातांचो आंकडो उणो जावपा खातीर दक्षीण गोंय पुलिसांनी अपघात जावपी वाठारांनी पुलीस तैनात केल्यात. मदींच वाहनांची तपासणी मोहीम राबोवन येरादारी नेम मोडप्यांचेर कारवाय करतात. तशेंच अपघातां वांगडा हेरूय गुन्यांवांनी उणाव जावपा खातीर नियाळ बसका घेवन पुलीस अधीक्षक सुचवण्योय दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
