भांगरभूंय | प्रतिनिधी
घुंवळे वखदां सांबाळिल्ल्याचें केलें मान्य
पणजी: घुंवळे वखदां सांबाळिल्ल्याचो गुन्यांव मान्य केल्ल्याचें निरिक्षण नोंद करून न्यायालयान युगांडा देशाच्या सान्यू फ्लोरन्स आनी नबांकेमा अरिसाट ह्या चलयांक दरेकी 9 म्हयन्यांची कश्टाची बंदखण आनी 10 हजार रुपया दंडाची ख्यास्त दिल्या. ख्यास्त भोगले उपरांत दोनूय चलयांक मायदेशांत धाडून दिवचें असो आदेश उत्तर गोंय जिल्हो आनी सत्र न्यायालयान जारी केला.
हणजूण पुलिसांनी 8 फेब्रुवारी 2023 दिसा वयल्या प्रकरणाचो गुन्यांव दाखल केल्लो. ते प्रमाण वनाचेभाट-हणजूण्यां रावपी दोन विदेशी चलयो घुंवळे वखदांचें सेवन करप आनी तस्करीत वांटेकार आशिल्ल्याची म्हायती खबऱ्यां कडल्यान पुलिसांक मेळिल्ली.
हे म्हायतीच्या आदाराचेर त्या दिसा सकाळीं 8.30 ते 11.30 मजगतीं पुलिसांनी रावते कुडीचेर धाड घाल्ली. हणजूण पुलीस निरिक्षक प्रशल नायक देसाय हांच्या मार्गदर्शना खाला उपनिरिक्षक स्नेहा सावळ, कॉन्स्टेबल लिना गोवेकार, विणा सावंत, प्रवीण पाटील आनी शंभा शेटगांवकार ह्या पंगडान ही धाड घाल्ली.
धाडींत पुलिसांनी दोनूय चलयां कडल्यान 45 हजार रुपयांचो सात ग्राम एक्स्टसी, 84 हजारांचो 10.3 ग्राम कोकेन आनी 34 हजारांचो 3.4 ग्राम एमडीएमए मेळून 1 लाख 61 हजार 400 रुपयांचीं घुंवळे वखदां जप्त केल्लीं. उपरांत पुलिसांनी घुंवळे वखदां विरोधी कायद्याचें कलम 22(ब) आनी 21(ब) खाला गुन्यांव दाखल करून सान्यू फ्लोरन्स आनी नबांकेमा अरिसाट ह्या युगांडा देशाच्या चलयांक अटक केल्ली.
न्यायालयान त्या दोगूय चलयांक पयलीं पुलीस कोठी दिल्ली. ती सोंपले उपरांत त्या दोगांकूय न्यायालयीन कोठयेंत धाडिल्लीं. मजगतीं, पुलीस तपास पुराय करून 4 एप्रील 2023 दिसा दोगां चलयां आड पणजेंतल्या उत्तर गोंय जिल्हो आनी सत्र न्यायालयान आरोपपत्र दाखल केलां. ह्या प्रकरणांत न्यायालयान दोगां चलयां आड आरोप निश्चीत करून खटलो सुरू केलो तेन्ना दोगांनीय न्यायालयांत घुंवळे वखदां सांबाळिल्ल्याचें मान्य केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
