भांगरभूंय | प्रतिनिधी
सदानंद तानावडे: गोंयचीं बायलां सक्षम; दिवचल गणपतीचें घेतलें दर्शन
दिवचल: देश पांवड्यार बायलां खातीर 33 टक्के आरक्षण जाहीर जालां. सगल्यो प्रक्रिया रितसर पुराय जाल्यो जाल्यार 2027 चे गोंय विधानसभा वेंचणुकेंत 33 टक्के आरक्षण लागू जावन गोंयांत उण्यांत उणी 13 बायलां आमदार जातल्यो अशी प्रतिक्रिया राज्यसभेचे खासदार सदानंद तानावडे हांणी उक्तायली.
सदानंद तानावडे हे दिवचले भौशीक गणेश मुर्तीच्या दर्शना खातीर आयिल्ले. त्या वेळार बायलां आरक्षणा विशीं विचारलें तेन्ना तांणी ही प्रतिक्रिया उक्तायली.
गोंयांत सुशिक्षीत तशेंच राजकारण समजुपी सक्षम बायलां आसात. ताका लागून निश्चीतपणान बऱ्यो सक्षम उमेदवार गोंय विधानसभेक मेळटल्यो असो विस्वास तांणी उक्तायलो.
लोकसभा वेंचणुके उपरांत ह्या बिला संबंदीच्यो विवीध प्रक्रिया सुरू जावन जनगणना मतदारसंघाचें समिक्षण जातलें. उपरांत गोंय विधानसभेची वेंचणूक जावपाची आशिल्ल्यान सगल्यो प्रक्रिया पुराय जाले उपरांत गोंयांत आरक्षण लागू जातना विधानसभेंत उण्यांत उणें 13 बायलांक आमदार जावपाची संद मेळटली. वेंचणूक आयोग हे विशीं कशे तरेन प्रक्रिया पुराय करता ताचेर तें निंबून आसा. 2029 चे लोकसभा वेंचणुकेंत मात निश्चीतपणान 33 टक्के आरक्षण निश्चीत आशिल्ल्याचें सदानंद तानावडे हांणी सांगलें.
दिवचल गणेश मुर्तीचें तानावडे हांणी दर्शन घेतलें. ह्या वेळार आमदार चंद्रकांत शेट्ये, आमदार प्रेमेंद्र शेट, कुंदन फळारी, अध्यक्ष प्रसाद नाटेकार, सचीव तुळशिदास परब, तशेंच मंडळाचे पदाधिकारी, नगरसेवक हाजीर आशिल्ले. दिवचल मंडळाच्या कार्याचें तानावडे हांणी अभिनंदन केलें. तांणी ह्या वेळार देणगीय दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
