भांगरभूंय | प्रतिनिधी
जेट पॅचरान केल्लें काम निकृश्ट दर्जाचें; वाहन चालकांनी उक्तायली तिडक
हरमल: मांद्रें मतदारसंघांतल्या हरमल, पालयें, मांद्रें आनी मोरजी पंचायत क्षेत्रांतल्या रस्त्यांची दुर्दशा जाल्या. जेट पॅचरान केल्लें काम निकृश्ट दर्जाचें जाल्ल्यान वाहन चालकांनी तिडक उक्तायल्या.
फाटल्या सप्तकांत कांय वाठारांतलीं फोंडकुलां जेट पॅचरान पुरयिल्लीं. जेट पॅचराचें काम तात्पुरत्या स्वरुपाचें जायत आशिल्ल्यान वाहन चालकांनी पयशांची उधळपट्टी जायत आशिल्ल्याचो दावो केला. भौशीक बांदकाम मंत्री जेट पॅचर म्हणल्यार जादवाची कांडी समजतात आसतले, पूण रस्त्याची दुरुस्ती फक्त वयले वयर आशिल्ल्यान रस्त्यार परतून फोंडकुलां पडल्यांत. हॉटमिक्सींग केले बगर पर्याय नाशिल्ल्याचें वाहन चालक हेमंश नायक हांणी सांगलें.
चवथ येवचे पयलीं मांद्रेंच्या रस्त्यांचे प्रधान्यान दुरुस्तीचें काम हातांत घेतिल्लें. पूण दुरुस्तीच्या नांवा खाला उधळपट्टी जाल्ल्यान रस्त्यांची स्थिती पयली भशेन जाल्ल्यान कांय कोटी रुपया फुकट गेल्ल्याचें चित्र आसा. खूबशा रस्त्यांक फुटभर खोल फोंडकुलां जाल्यार रस्त्यांच्या रुंदीच्यो चरो उदका पायपलायन आनी केबल्साची काम केल्ल्यान सगली कडेन रस्त्याची दुर्दशा जाल्ल्याचें नायक हांणी सांगलें.
पालयें वाठारांतल्या रस्त्यांचें काम फाटल्या आठ ते धा वर्सां पयलीं जाल्लें. ह्या रस्त्यांचें काम रोखडेंच सुरू जातलें अशें खूबशे फावटी खात्यान सांगिल्लें. पूण अजून लेगीत काम सुरू जावंक नाशिल्ल्यान सरकाराचें लक्ष नाशिल्ल्यान केरी वाठारांतले वाहन चालक लोकसभा वेंचणुके वेळार आपली भुमिका स्पश्ट करपाची चिन्नां दिसूंक लागल्यांत.
जेट पॅचर निरुपेगी
हरमल वाठारांत कांय फोंडकुलां जेट पॅचरान पुरयल्यांत. पूण बँक ऑफ इंडिया कुशीचें केल्लें काम व्हांवून गेलां. हें काम फक्त आठ दीस बरें उरलें, आनी पडिल्ल्या पावसान व्हांवून गेल्ल्यान वाहन चालकांनी निरशेणी उक्तायली. लोकांच्या पयशांची अशी उधळपट्टी करप गैर आसून सरकार आनी संबंदीत खात्यान हातूंत लक्ष घालचें अशी मागणी वाहन चालकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
