भांगरभूंय | प्रतिनिधी
रेल्वे 2 ते 3 वरां धांवता उसरां; स्टेशनाचेर सुविधांचो उणाव
मडगांव: कोंकण रेल्वे मार्गार चवथीच्या उत्सवा खातीर ह्या वर्सा चड गाडयो सोडिल्ल्यो आसल्यो तरी दोन ते तीन वरां उसरां धांवपी गाडयांक लागून प्रवाशांक व्हड प्रमाणांत त्रास सोंसचो पडटा. गाडयांनी आनी स्टेशना वयली गर्दी, पावस आनी स्टेशना वयल्या सुविधांचो उणाव ह्या वेळार दिसून आयलो.
कोंकण रेल्वे मार्गार ह्या वर्सा चवथीच्या उत्सवाच्या काळांत भाविकांची जावपी गर्दी टाळपा खातीर चड गाडयो सोडिल्ल्यो. पूण ह्याच चड गाडयांच्या वाडिल्ल्या फेरयांक लागून नेमान येवपी गाडयां सयत विशेश गाडयांचें वेळापत्रक इबाडलें. रेल्वे स्टेशनार आयले उपरांत प्रवाशांक गाडयेक देड ते दोन वरां कळाव आशिल्ल्याची सुचोवणी मेळटा. हाका लागून स्टेशनारूच रावचें पडटा. तातूंत थारावीक प्रवाशां खातीर बसकांची वेवस्था आशिल्ल्यान हेरांक मेळत थंय बसून गाडयांची वाट पळोवची पडटा.
दोन ते तीन गाडयांचे प्रवासी एकाच वेळार स्टेशनार आयिल्ल्यान आनी तातूंत पावसांत भिजून आयिल्ल्या प्रवाशांक स्टेशनार सारके उबे लेगीत रावंक मेळटलें अशी सुवात मेळना. तातूंतच रेल्वे स्टेशना वयल्या नितळसाण घरांची संख्याय उणी आशिल्ल्यान प्रवाशांक रांगेत रावपाची वेळ आयल्या.
मडगांव सयत कोंकण रेल्वे मार्गा वयल्या कांय स्टेशनांचेर रेल्वे थांबत आशिल्ल्या कांय डब्यां पुरतीच शेड आसा. गाडयेची सुचोवणी आयले उपरांत भर पावसांत डब्यांत चडपाचे सर्तींत प्रवाशांक वांटो घेवचो पडटा. विशेश गाडयांतले गर्दीक लागून उबे रावपा खातीर सुवात सोदची पडटा. नितळसाण घरांची बिकट परिस्थिती आनी निमाण्या स्टेशनार पावचे पयलींच सोंपिल्लें उदक अशा संकश्टांक सामकार वचत सद्या कोंकण रेल्वेचे प्रवासी प्रवास करतात.
बेघर आनी भिकाऱ्यांच्या राबित्यान सुरक्षीततायेचो प्रस्न
मडगांव जंक्शनार देंवले उपरांत प्रवाशांक स्टेशनाच्या फ्लायओव्हराचेर बशिल्ल्या आनी अस्ताव्यस्त अवस्थेंत रस्त्याच्या मदेकांत न्हिदिल्ल्या बेघर आनी भिकाऱ्यांक सामकार वचचें पडटा. तातूंतल्यान वाट काडून वचप प्रवाशांक असुरक्षीत दिसता. रेल्वे पुलिसां कडल्यान जंक्शन वाठारांत बेघर आनी भिकाऱ्यां पसून सुटका मेळची अशी मागणी जायत आसा.
प्रवाशांची पांयपीट
मडगांव रेल्वे स्टेशनार येवपी कांय एक्स्प्रेस गाडयो ह्यो 1 ते 3 प्लॅटफॉर्माचेर येतात. तातूंतल्यो कांय गाडयो ताच्या फुडल्या प्लॅटफॉर्मार उब्यो करतात. हाका लागून प्रवाशांक सुमार देड किलोमिटराचो भोवताडो मारून फ्लायओव्हरा वयल्यान मुखेव प्रवेश दारार येवचें पडटा. तातूंतच त्या प्लॅटफॉर्मार बांदकाम सुरू आशिल्ल्यान पावसांतल्यानूच वाट काडीत वचपाची सर्कस करची पडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
