भांगरभूंय | प्रतिनिधी
पांखल्यान पंढरीक फोन दितगेर कळ्ळें की ह्या लोंढो भिकाजीला धमकीसत्रांचो बरोच येफेद पंढरीचेर जाला आनी ताण येवन ताका जोरान आड घाला.. (आतां मुखार….)
लोंढो भिकाजीलें धमकीसत्र गंडभैरांवाच्या फाटबळान चालू आसलें. गंडभैरांव आपलें आंग दाखयनासतना फाटल्यान रावून लोंढो भिकाजीक परतो हाडून, नियंत्रण आनी लगाम आपले कडेन दवरूंक आपले परीन जाता तितलो यत्न करीत आशिल्लो. एका परदेशांत आशिल्ल्या वांगड्या कडेन हातमेळोवणी करून गंडभैरांवान ताका ई- मेल घालूंक लायली. तीस तारखेक सांजवेळा ह्या वांगड्यांन बरयलें की गंडभैरांव सोडून ही सोसायटी चलोवचें काम बरें करून आनीक कोणूच करू शकपा ना, ताकाच सगळ्यांत चड गिन्यान आसा आनी देखून हें काम अशेंच मुखार चालू दवरपाक वांगड्यांनी ताका पालव दिवचो, इतलेच न्ही, मुखार तागेल्या कारभारांत कोणेच दुसऱ्या वांगड्यांनी मेतेर जांवचें न्ही असो सल्लोय ताणें दिल्लो. एकंदरीत परत एकदा माकडाच्या हातांत कोलीत दिवपाची तो शिफारस करतालो. दुसऱ्या खंयचाय वांगड्यांन ह्या मेलाक प्रतिसाद दिवूना हे पळोवून ताणें दुसरे दीस म्हणजे एक तारखेक आनी एक ई- मेल रुपी बाण सोडून पळयलो, ताणें बाकीच्या वांगड्यांक सांगलें की तागेल्या प्रस्तावाचें समर्थन केल्यार तो सगळ्यांच्या वतीनं ताडीमोडीक मनयता. हेवूय खेप ताका प्रतिसाद मेळूना.
हे वटेन आमची धडपड चालू आशिल्ली. सगळे दुसरे पर्याय उबे जाताले, पूण पंढरी आनी कामगार हांचे कितें जातलें तोवूय विचार आमकां करचो आसलो. लोंढो भिकाजीली कंपनी म्हळ्यार एकपात्री तुटय कंपनी आनी तो ह्या कामगारांक काम दितलो म्हणटा तें शक्य कोटीतलें दीसनाशिल्लें. तरी पूण बॅकअप म्हणून पंढरीच्या सुवातेर नेमपाक दुसरो मनीसुय आमी पळोवन तयार दवरिल्लो. पंढरी कडेन आनी बाकीच्या कामगारां कडेन सारकें उलोवन मुखावेले पावल दवरप हेंच त्या खिणाक उचीत आशिल्लें. फोनार हांव, तीमण्णा आनी आमच्या पंगडांतले वांगडी ताचे कडेन उलयिल्ले. पंढरीन लोंढो भिकाजील्या आजनेऱ्यांक वित्रागुन, आपूण ताचे खातीर वा सोसायटी खातीर हाचे फुडें काम करचो ना अशें म्हणिल्लें. हे सोसायटीक काम करपाक दिवंचो ना असो भंयूय लोंढो भिकाजीन ताका घाल्लो. भायर नोकरी मेळप ताका शक्य आशिल्लें. कोणा खातीर कोणाचें अडना, पूण इतल्या वर्सांचे दोन्ही वाटेन उबे जाल्लें नातें तोडून दुसऱ्याक कारभारी हाडून दवरल्यार सगळ्या वांगड्यांकूय बी नव्या मनश्यांची संवकळ जायसर वेळ वताशिल्लो. नवो मनीस कसो आसत हेंवूय सांगू येनाशिल्लें. पंढरी कडेन उलोवन ताच्या मनांतलो भंय आनी वित्राग काडप गरजेचें आशिल्लें आनी तो जर काडपाक आमका जमलें जाल्यार नव्या मनशाक हाडून तयार करची आमकां गरज नासली.
ह्या वेळार पांखल्यान आमकां परत एकदा मदतीचो हात मुखार केलो. ताणें पंढरीगेर वचून ताका परत कामार वच, फुडें कितेंय जाल्यार फोन करना फुडें आपूण थंय धांवून येता अशी खात्री पंढरीक दिली आनी तागेलो आत्मविस्वास वाडयलो. पांखल्यांल्यो चार- आठ कडे वळखीय बी आशिल्ल्यो.
दोन दीस पासार जाऊन आयज तिसरो दीस उदेल्लो. ग्यानसिंग आपल्या गार्डा खातीर घर सोदूंक दोन खेप ह्या वाड्यार आयिल्लो. आनी ताका समजल्ले की लोंढो भिकाजींन वाड्यार ह्या सेक्युरिटीक भाड्यानं घर दिवपाचें ना अशे शिटकायिल्ले. भाड्यान दिवपी घरकाराच्या मनांत एक भंय निर्माण केल्लो, वाड्यार आशिल्ल्या पसरकाराक, वाठारांत रावपी बाकीच्या कंपनीच्या कामगाराक सांगुन आडमेळी घालपाचो एक यत्न ताणें केल्लो. दोन दीस तागेलो गार्ड सेगीत पाळत दितालो. म्हाका हे ग्यानसिंगा कडल्यान आयकतगेर पटलेंना. ग्यानसिंग फटी बी उलयना मु अशेंय थोडो वेळ म्हाका दिसलें. ज्या वांगड्यान चार दिसा खातीर आपली एक कूड रावपाक दिल्ली, ती जाता तितले बेगीन परत दिवप हाचींय म्हाका चिंता आशिल्ली. लोंढो भिकाजी कितलो नीच ते ताणें दाखयिल्लें, पूण गंडभैरांव बी हे बाबतींत ताका आधार करतलो अशे म्हाका तेन्ना दिसूं नाशिल्ले. हांवें ग्यानसिंगाक आपोवन ताचे वांगडा घर सोदपाची इत्सा उक्तायली. तिसरे दीस सांजवेळा हांव आनी ग्यानसिंग वांगडाच घर सोदूंक गेले आनी तो म्हणटालो तें खरें हें म्हाका कळून चुकलें. मागीर आमी वाड्या वेल्या म्हालगड्यां कडेन उलोवन, एका घरकाराक पटयत, भाडे आनी अनामत जमा करीत कूड घेतली आनी एक पाडाव पार केलो.
पांखल्यांन तेंको दितगेर पंढरीली धिटाय वाडिल्ली. दुसऱ्या एका कामगाराक आधाराक घेऊन तो कामार रुजू जाल्लो. पंढरी येवप म्हळ्यार आमी मुखेल पाडाव पार केल्ले वरी आशिल्लें. आनी ह्या वटेन लोंढो भिकाजीन एकाय कामगाराक दुसरें वा दुसरे कडे काम दिवंक नाशिल्लें. तागेलें फक्त धमकीसत्र चालू आशिल्लें आनी काम दितलों अशी फक्त हूल सगळ्या कामगारांक तो दितालो. पंढरीन परत हातांत सुत्रां घेवपाक सुरवात केल्ली. मागीर बाकीच्या कामगारांक आमी आपोवन हाडलें. सगळे आपआपले कामाचे कितें जातलें ह्या ताणांत आशिल्ले. थोड्यालें घराचें भाडे दिवचें आशिल्लें. एके वटेन धमक्यो आनी दुसरे वटेन बेकार उरपाचो भंय, ह्या चिंतेन तांगेलो जीव अर्ध जाल्लो. तांका थोडे आगावू दुडू दिवून विस्कटिल्ली घडी जाग्यार घालपाचो एक ल्हानसो यत्न हांवे केलो. आमगेल्या नव्या गार्डान कंत्राटदाराक सांगून तीन लोकांक ताचे सकल कामाक दवरले. लागीं लागीं सगळ्यो मूलभूत देखभालीच्यो गरजो आमच्योय बी पुराय जाल्ल्यो. दोन कामगार उरताले आनी तांतुतलो एकटो तात्पुरतो आशिल्ल्यान दुसऱ्याक एक म्हयनो सोडून घेवपाचो आमी विचार केलो. तो मेरेन लोंढो भिकाजी हांकां तरी काम दिता काय ना तेंय आमकां पळोवक मेळटाशिल्ले.
हे वटेन आमी पयलींच्या गंडभैरांवाले समितीक ई-मेल घालून लोंढो भिकाजीले म्हयन्याचें बिल फारिक केलां काय ना हाची चवकशी केल्ली. पूण तांणी उत्तर दिवंक नाशिल्लें. दलभंजनान आपूण समितीचेर आसलो तरी आपूण सिगनेटरी न्ही म्हणत हात वयर काडले. पाषावं उत्तर दिनाशिल्लो. सगळे गंडभैरांवाले पेदे मूग गिळून चुप्प आशिल्ले. राजीनामो दितगेर गंडभैरांवाले समितीन खंयचेय चेक सायन करचेनात अशी हवा तांणी तयार केल्ली. हातुंकूय गंडभैरांवाली नाडपेंन्ना चालू आशिल्लीं.
आमकां पंढरी कडल्यान समजल्लें की तांचो पगार सात, आठ तारीखे मेरेन लोंढो भिकाजी दितालो. जशी आठ तारीख आयली कामगारांनी लोंढो भिकाजीक फोन करूंक सुरवात केल्ली. लोंढो भिकाजी तांकां फक्त गाळयांनी उत्तर दितलो, सोसायटींत परत कामार वतात म्हूण तांकां संवतालो, पूण पगार दिवंची खबर करनाशिल्लो. तांकां पगार दिना म्हूण सांगपाक हे कामगार म्हजे म्हऱ्यांत आयले . हांवे तांगेलें गाराणें समजून घेतलें, एका चलाख कामगारान लोंढो भिकाजीलें उलोवप रेकॉर्डय केल्लें, तें ताणें म्हजे कडेन शेयर केलें. एक तर पगार दिना वयल्यान शांपता “उल्टा चोर कोतवाल को डांटे” असो ताचो उलोवण्याचो सूर आशिल्लो. चोर तो चोर आनी वयल्यान शिरजोर ही वृत्ती उलोवण्यांतल्यान जाणवताली. हांवे तांकां समजायत सांगलें की आमगेली जबाबदारी ह्या म्हयन्याच्यान चालू जाता, आमी फाटल्या म्हयन्याच्या पगारा विशीं लोंढो भिकाजी कडे उलोवंक शकनात. आमचो ताचे कडेन संबंध ना, तरी पूण ताणें फटयले जाल्यार म्हजो आनी तीमण्णाचो तुमकां पूर्ण आधार आसतलो, अशे आस्वासन हांवें तांकां दित तांचो आत्मविस्वास वाडयलो. तांका फक्त एकूच सुचोवणी केली, की तुमचे कडेन जी चालचलणूक लोंढो भिकाजी करता ती ताडीमोडी आनी गंडभैरांवाक कळयात आनी तांका लोंढो भिकाजी कडेन उलोवन हो प्रस्न सुटावो करुंदी. त्या प्रमाण मधले सुटयेंत हे दोन- तीन कामगार गंडभैरांवांक मेळूंक गेले. लोंढो भिकाजी पगार दिना म्हूण तांकां दोगांकूय कळयले. निर्दय आनी नालायक गंडभैरांवांन तांकां मनीसपण दाखयलेंना, ती आपली जबाबदारी न्ही म्हणत हात फांफुडले. जो विस्वास घेवन कामगार ताचे फुड्यांत गेल्ले त्या विस्वासाचो घात कांबळीफुजांवान केल्लो. …. (फुडें चलता…)
अजय करमली
93737 46957
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
