भांगरभूंय | प्रतिनिधी
म्हापशेंः मार्केटांतल्या चण्याची खोरणा आळींतल्या गणेश बेकरीक उजो लागलो. ह्या उज्यांत इलेक्ट्रिक ओव्हन आनी बेकरींतली बिस्कुटां उज्यांत लाशिल्ल्यान सुमार 80 हजारांचें लुकसाण जालें. म्हापशें उजो पालोवपी दळान रोखडीच घडणूक थळार धांव मारली आनी उजो नियंत्रणांत हाडलो हाका लागून व्हड दुर्घटना टळ्ळी.
ही घडणूक शुक्रारा सकाळीं सुमार 6.15 वरांच्या सुमाराक घडली. म्हापशें मार्केंटांतल्या चण्याची खोरणा आळीच्या मुखार बशिल्ल्या सदीच्या वेपाऱ्यांक विक्रांत टक्केकार हांच्या गणेश बेकरी दुकानांतल्यान धुंवर येता ते दिसले. तांचेनी रोखडीच ही म्हायती उजो पालोवपी दळाक दिली. ते प्रमाण म्हापशें उजो पालोवपी दळाचे उपअधिकारी प्रकाश कान्नाईक हांच्या फुडारपणा खाला दळाच्या जवानांनी घडणूक थळार धांव मारली. भितरल्यान धुंवर भायर सरतालो आनी बेकरीच्या शटराक कुलूप आशिल्ले. बेकरीच्या धनया कडेन संपर्क करपाचो यत्न केलो. पूण तांचे कडेन संपर्क जालो ना. बंद दुकानाचे कुलीप तोडून शटर उक्तो केलो जाल्यार धुंवर पुराय दुकांनांत पातळिल्लो. उदक मारले जाल्यार दुकानांतले बेकरीचे पदार्थ इबाटले म्हूण दळाच्या जवानांनी सीओटू फोमचो उपेग केलो आनी उजो नियंत्रणांत हाडलो. उपरांत जवानांनी उजो लागिल्लो ओव्हन भायर काडलो तेन्ना तांतुतल्या बिस्कुटांक उजो लागलो आनी सगळी बिस्कुटां उज्यांत लासली.
उजो पालोवपी दळा कडल्यान हे घडणुकेची म्हायती मेळ्ळे उपरांत म्हापशें पुलीस हवालदार तुषार रेडकार आनी पुलीस रॉबर्ट जीपीचे हवालदार रुपेश कोरगांवकार हांणी आपल्या वांगड्या वांगडा थंय वचून पंचनामो केलो. चुकून वीज पुरवण बंद करुंक नाशिल्ल्यान ही घडणूक घडिल्ल्याचे दुकानाचो धनी टक्केकार हांणी सांगलें.
मजगतीं, शुक्रारा म्हापशेंचो सप्तकी बाजाराचो दीस आशिल्ल्यान व्हडा प्रमाणांत विक्रेते आपलो म्हाल घेवन बाजारांत विकपाक बसतात. हो उजो पातळिल्लो जाल्यार व्हडली दुर्घटना जावपाची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
