भांगरभूंय | प्रतिनिधी
भारतीय घरांनी गांवठी तूप शेंकड्यांनी वर्सां सावन वापरतात. गांवठी तुपाच्या वखदी गुणांक लागून ताचो घरगुती उपायांतय उपेग करतात. पूण चडशा लोकांक चपाते सयत गांवठी तूप खावपाक आवडटा. तूप चपातेची रूच वाडयतात, पूण तें भलायके खातीरूय फायद्याचें थारता.
वजन उणें करपाची इत्सा आशिल्ले लोक चड करून तुपा पसून पयस रावतात. चपात्यांक तूप लावचे पयलीं ते जायते फावट विचार करतात. कांय जाणांच्या मतान तुपा वांगडा चपाती खाल्यार वजन वाडटा. तुपांत जायते तरेची चरबी आसता, जाका लागून लोक ताका आहारांत आस्पावपाक भियेतात. तुपा वांगडा चपाती खाल्यार वजन वाडटा काय?
पोशणशास्त्रज्ञ म्हणटात, तुपा वांगडा चपाती खाल्यार वजन वाडपा कडेन कांयच संबंद ना. ते म्हणटात, जर चपाते वयर तूप लावन खाल्यार वजन देंवोवप सोंपे जाता. कारण ताचो ग्लायसेमीक इंडेक्स उणो जातलो. तशेंच रक्तांतली साखरूय वाडची ना. ग्लायसेमीक इंडेक्स आपल्या रक्तांत ग्लुकोजचेर जेवण कितले बेगीन परिणाम करता हें सांगता.
तूप खाल्यार कोलेस्टरॉल सुदारताच, पूण हार्मोनांचें समतोलूय सुदारता अशें भलायकी तज्ञ सांगतात. ज्या लोकांक पचन तंत्रांत कसलेय त्रास जातात तांकां गांवठी तूप खूब फायद्याचें थारूंक शकता. आमी खंयच्याय अन्न पदार्थांत तूप घातल्यार ताचें शोशण दुप्पट जाता.
करिना कपूर, मलायका अरोरा सयत जायते बी- टाउन सेलिब्रिटी तूप घेवन आपलो दीस सुरू करतात हें कळटकच तुमकां अजाप जातलें. ताका लागून तांकां वजन उणें करपाक मदत जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
