भांगरभूंय | प्रतिनिधी
-फाटल्या दोन वर्सां पसून मानांकनांत घसरणः एनआयआरएफ
पणजी : देशांतल्या उच्च शिक्षण संस्थांचें मानांक थारावपी नॅशनल इन्स्टिट्यूशनल रँकींग फ्रेमवर्क (एनआयआरएफ) वळेरेंत अंदूंय गोंय विद्यापिठाक पयल्या शंबरांत सुवात मेळूंक ना. दुसरे वटेन फर्मागुडयेंतल्या एनआयटी आनी फार्मसी म्हाविद्यालयाचीय क्रमवारींत घसरण जाल्या. सांखळेंतल्या गोंय इन्स्टिट्यूट ऑफ मॅनेजमेंटान मात 36 वयल्यान 33 सुवात मेळयल्या.
2021 मेरेन गोंय विद्यापिठाक ‘एनआयआरएफ’ वळेरेंत कायम पयल्या शंबरांत सुवात मेळिल्ली. पूण फाटल्या दोन वर्सां पसून विद्यापिठाच्या मानांकनांत घसरण जायत आसा. फर्मागुडयेतल्या एनआयटी, पणजेंतल्या फार्मसी म्हाविद्यालय तशेंच सांखळेंतल्या गोंय इन्स्टिट्यूट ऑफ मॅनेजमेंटान अनुक्रमे इंजिनिअरींग, मॅनेजमेंट आनी फार्मसी विभागांत पयल्या शंबरांत कायम आसात. पूण एनआयटी आनी फार्मसी कॉलेजचे मानंकन घसरत आसा. गोंय इन्स्टिट्यूट ऑफ मॅजेनमेंटाचे क्रमवारींत मात सुदारणा जाल्या.
इंजिनियरींग विभागांत एनआयटी 2019 त 87 व्या, 2020 त 77 व्या, 2021 त 85 व्या जाल्यार 2022 त 88 वे सुवातेर आशिल्ले. अंदूं परतून एनआयटीची क्रमवारींत घसरण जावन ते 90 व्या सुवातेर पावलें.
गोवा फार्मसी कॉलेज 2019त 43 वे, 2020 त 47 वे, 2021 त 56 वे जाल्यार 2022 त55 वे सुवातेर आशिल्ले. अंदूं ते 66 वे सुवातेर पावलां. जाल्यार सांखळेंतल्या गोंय इन्स्टिट्यूट ऑफ मॅनेजमेंट संस्था 2019 त 50 वे, 2020 त 48 वे, 2021 त 35 वे जाल्यार 2022 त 36 वे सुवातेर आशिल्ली. अंदूं क्रमवारींत मात हे संस्थेक 33 वी सुवात मेळिल्ल्याचे अहवालांतल्यान दिसून येता.
मजगतीं, पोरूं प्रमाणूच अंदूं गोंय विद्यापीठ इंडियन इन्स्टिट्यूट ऑफ सायन्स, बंगळुरू – कर्नाटक अव्वल जाल्यार दिल्ल्लींतले जवाहरलाल नेहरू विद्यापीठ दुसरे सुवातेर आसा. जाल्यार अभियांत्रीकी विभागांत इंडियन इन्स्टिट्यूट ऑफ टॅक्नॉलॉजी मद्रास-चेन्नय पयले, जाल्यार इंडियन इन्स्टिट्यूट ऑफ टॅक्नॉलॉजी – दिल्ली दुसरे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
