भांगरभूंय | प्रतिनिधी
भावंडांनो
माया म्हयन्याची सुटी सोंपत आयली. ह्या सप्तकांत तुमच्यो शाळा सुरू जातल्यो. तुमी दर एकल्यान फुडल्या वर्गाची तयारी केल्या न्हय? म्हळ्यार, पुस्तकां, चोपड्यो, रेनकोट, सत्री आनी हेर सामानांची तयारी केली न्हय? शाब्बास! अशींच गुणी भुरगीं जायात हां… भावंडांनो, ह्या सप्तकांतली 5 तारीख घेवन येता म्हत्वाची सांगणी. कसली काय म्हणटात? 5 जूनाक पाळटात पर्यावरण दीस. सांगतां, आयकात.
भावंडांनो, आमचे भोंवतणी आमकां जें जें कितें दिसता, तें म्हळ्यारच पर्यावरण. हय. पर्यावरण म्हळ्यार भोंवतणचें सैम, तातूंतलें व्हांवपी वारें, उदक, भोंवतणच्यो तरेकवार वायू… न्हंयो, तळीं, बांयो, दोंगर, शेतां-भाटां, मळब, रूख, रानां, दर्या, वनस्पत ह्या सगळ्या गजालींचें आमचे भोंवतणी आवरण जें आसा, तेंच पर्यावरण. ह्यो सगळ्यो गजाली आमकां एके तरेचो आनंद दिता. सूख दिता, जें आमकां आमचें जिणें जगपाक खुबूच आदार करता. ताचे बगर आमी, हे धर्तरेवयलो जीव जगूंकच शकना. आमचो उस्वासूच म्हणल्यार जाता. पुणून भावंडांनो, खंतीची गजाल म्हळ्यार आमी मनशांनी आमच्या सुवार्था खातीर ह्या सगळ्या गजालींचेर शेक गाजयला आनी गाजयत आसा. जें आमच्या जिणेक खूब घातक आसा.
भावंडांनो, उद्देगीकरण आनी रानांची तोडमोड. ह्या दोन गजालीं वरवीं हवामानांत आकांताचो बदल घडून येत आसा. हे धर्तरेर आनी मनशां करीत आशिल्ले मस्ती वरवीं आमचे कडल्यान प्रदुशणां जायत आसात. आमचे बेशिस्तीक बेपर्वायेक लागून उदकाचें, हवेचें, आवाजाचें प्रदुशण वाडत आसा. नकळटां मनशाचें जिवीत उणें जायत आसा. भोंवतणी वाडीव लोकसंख्या, शारीकरण, उद्योगधंदे, कोयर हांचे वरवीं जी घाण पसरता तिचे वरवीं नाका आशिल्ली भिरांकूळ दुयेंसां पसवतात. पळयात हां… आमकां मेळपी प्राणवायूचेर तांचो परिणाम जायत आसा.
हय, भावंडांनो आमी मनीस अशेच सुवार्थान वागले जाल्यार आमचें जगप आमकां कुस्तार जातलें. देखुनूच भावंडांनो तुमकां हांव कळकळीन तळमळीन उलो मारतां, तुमी हांव सांगता तें इल्लेंशें मतींत दवरशात? तशे ते सांगणे प्रमाण वागशात? वागातूच— तशें केल्यारूच फुडारांत तुमकां आनी आमकां मेकळो उस्वास घेवंक मेळटलो. नक्कीच. दुबाव नासतना म्हज्या सांगणेचेर भरवंसो दवरात.
भावंडांनो, पर्यावरणाचे राखणे खातीर दरेकल्यान आपले परीन यत्न करीत रावंक जाय. 5 जून हो पर्यावरणा खातीर दीस पाळुंकूच जा. ते खातीर आमी भोंवतणी वनस्पतीचीं रोपां रोवंक जाय. प्लास्टिक पिशव्यांचो वापर टाळूंक जाय. कोयराचे नेम घालून दिल्ल्या त्या त्या कुंडयांनी उडोवंक जाय. उदकाचो गैरवापर करूंक जायना. म्हेळें उदक, सांडपाणी मेकळे वा उक्ते सुवातेर वा शेतांनी, व्हाळांनी सोडूंक जायना. रासायनीक साऱ्याचो वापर करपाक जायना. किटकनाशकांचो वापर कशायकसोय करचो न्हय.
भावंडांनो, आमी आमचें जिवीत जगतना आमच्या आदारा खातीर दुसऱ्यांकय जगयतलीं ही भावना काळजांत दवरूंक जाय. अशीं जर तुमी वागलीं तर दुबाव नासतना आमचें भोंवतणचें पर्यावरण बरें उरतलें आनी तुमकां सदांकाळ मेकळो उस्वास घेवंक मेळटलो. हांवें सांगलां ताका तुमी पाळो दितलीं न्हय. दियातूच…. बरें तर.. उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
