भांगरभूंय | प्रतिनिधी
पणजी : कोरोना म्हामारींतल्या दोन वर्सांत दाबोळी विमानतळाक सुमार 148 कोटींचे लुकसाण जालां. जाल्यार खाजगी, भौशीक भागिदारींतल्यान (पीपीपी) तत्वाचेर चलपी मोपांतल्या मनोहर आंतरराष्ट्रीय विमानतळाकूय चालू वर्सांत 148.34 कोटींचें लुकसाण जाल्ल्याचे केंद्र सरकारान जारी केल्ल्या एका अहवालांतल्यान स्पश्ट जाला.
मोपांतलो मनोहर आंतरराष्ट्रीय विमानतळ कार्यान्वीत जावपा पयलीं गोंयांत फक्त एकमेव दाबोळी विमानतळ सुरू आशिल्लो. केंद्र सरकारच्या अहवाला प्रमाण, 2018-19 त ह्या विमानतळाक 137.48 कोटींचो फायदो जाल्लो. 2019-20 त तातूंत वाड जावन 146.87 कोटींचो फायदो मेळिल्लो. पूण ते उपरांत कोरोना म्हामारीच्या काळांत विमानसेवा बंद आशिल्ली. ताचो फटको दाबोळी विमानतळाक बसलो.
2020-21 त दाबोळी विमानतळाचें 118.04 कोटी आनी 2021-22 त 30.03 कोटी इतले लुकसाण जालें. कोरोना निर्बंध काडले उपरांत विमानसेवा परतून सुरू जाली. पूण 2022-23 त विमानतळाक फक्त 48.39 कोटींचोच फायदो मेळिल्ल्याचे अहवालांत नमूद केलां. मजगतीं, कोवीड काळांत विमान येरादारी सेवा जायते म्हयने बंद आशिल्लीं. ताका लागून गोंयांतल्या दाबोळी विमानतळा सयत भोवतेक विमानतळांचो 2020-21 आनी 2021-22 ह्या दोन वर्सांत कोट्यांनी रुपयांचो महसूल बुडला, अशें आंकडेवारींतल्यान स्पश्ट जाला.
‘पीपीपी’ तल्या 14 विमानतळांतल्यान फक्त तिनूच फायद्यांत
मोपांतल्या मनोहर आंतरराष्ट्रीय विमानतळा सयत देशांतली 14 विमानतळां ‘पीपीपी’ तत्वाचेर सुरू आसात. तातूंतल्या 11 विमानतळांक 2022-23 त कोट्यांनी रुपया लुकसाण जालें. हातूंत कन्नूर, दिल्ली, मुंबय, अहमदाबाद, लखनौ, मंगळुरु, जयपूर, गुवाहाटी, तिरुअनंतपूरम, दुर्गापूर आनी मनोहर आंतरराष्ट्रीय विमानतळाचाे आस्पाव आसा. फक्त कोचीन, बंगळुरु आनी हैदराबाद ह्या तीन विमानतळांकूय फायदा मेळिल्ल्याचे अहवालांत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
