भांगरभूंय | प्रतिनिधी
पणजीः रेवोल्युशनरी गोवन्स पक्षा खाला चलिल्ल्या कोफुसांवाचें गुपीत आयज उक्तडार येतलें. कितलेशेच दीस ओगी आशिल्ले आरजीपीचे आमदार विरेश बोरकार आयज सांजेवेळार आपलें मौन मोडटले. हे विशीं तांणी विधानसभेच्या चेंबरांत पत्रकार परिशद आपयल्या.
आयज विरेश बोरकार आपली बाजू मांडून भौसा मुखार येतले, अशी बातमी आयच्या दिसाळ्याचेर भांगरभूंयन उजवाडाक हाडिल्ली. बोरकार हांणी स्वता ते बातमेची पुश्टी केल्या. आयज सांजेवेळार ५ वरांचेर ते पत्रकार परिशदेंत स्पश्टीकरण दितले.
मनोज परब हांणी राजीनामो दिले उपरांत बोरकार हांची कसलीच प्रतिक्रीया नाशिल्ली वा तांचो पत्तो नाशिल्लो. देखून तांचे भुमिकेचेर सगळ्यांचें लक्ष लागून उरिल्लें. ते पक्षांत रावतले काय मनोजा भशेन आपली दुसरी वाट धरतले असो प्रस्न लोकांच्या मनांत उबो राविल्लो. ते भायर परब हांचे समर्थक ‘यो यो बेगीन यो विरेश बोरकार बेगीन यो’ अशें पोस्ट फेसबुकाचेर घालत सुटील्ले.
आयज हे सगळे प्रस्न आनी दुबावांचेर बोरकार आयज पड्डो घालतले. आरजीपीचो फुडार आतां बोरकार हांच्या स्पश्टीकरणाचेर निंबून आसा. बोरकार कितें निर्णय घेत हाचेर गोंयकारांचें लक्ष लागून उरलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
