भांगरभूंय | प्रतिनिधी
पणजीः वीज खात्यान स्मार्ट मिटर लावपाचे निविदा प्रक्रियेंत खूब अनियमितताय जाल्या. प्रकल्पाच्या अदमासाच्या खर्चा परस ९० टक्के चड बोली लावपी कंपनीक ही निविदा दिल्या. स्मार्ट मिटराक लागून लोकां मदीं भंयाचें वातावरण निर्माण जालां. हे प्रक्रियेंत भ्रश्टाचार आसा आनी ती रद्द करपाक जाय. अशें जालें ना जाल्यार रस्त्यार देंवून हाचे आड खर निशेध करपाची शिटकावणी कॉंग्रेसीचे प्रदेश अध्यक्ष अमित पाटकार हांणी दिल्या. सोमारा पक्षाच्या शिश्टमंडळान खात्याच्या मुखेल अभियंतो स्टीफन फर्नांडीस हांकां मेळून हे संबंदी निवेदन सादर केलें.
राज्यांत स्मार्ट मीटर लावपाक प्रस्तावीत खर्च सुमार ४६७ कोटी रुपया आसा, अशें पाटकार हांणी सांगलें. मात खात्यान ८९० कोटींचे निविदेक मान्यताय दिल्या. निविदा प्रक्रियेंत तीन कंपनींनी वांटो घेतिल्लो. ह्यान पयलीं खात्यान जे कंपनी कडल्यान स्मार्ट मिटर घेतिल्ले ते कंपनीक काळे वळेरेंत घाल्या. हे कंपनीन बर्या दर्जाचे मिटर दिवंक नाशिल्ल्यान अशें केलें. मात न्यायालयाच्या आदेशा उपरांत ही कंपनी काळे वळेरेंतल्यान काडून उडयली. स्मार्ट मिटर घालपाची प्रक्रिया म्हळ्यार जनतेच्या करांतल्यान एकठांय केल्ल्या पयशांचें लुकसाण. हे प्रक्रियेंत व्हड भ्रश्टाचार जाला.
पांच वर्सां आदीं डिजिटल मिटरांतूय असोच घोटाळो जाल्लो. वीज वापरा संबंदी म्हायती एकठांय करपा खातीर स्मार्ट वीज मिटर गरजेचें अशें खात्याचे अधिकारी सांगतात. पूण ट्रान्सफॉर्मराचेर स्मार्ट मिटर लावनय असो डेटा मेळूंक शकता. हाचे खातीर गिरायकांचेर अतिरिक्त भार घालपाची गरज ना. सरकारान लोकांचेर गरजे भायर भार लादचो न्हय. फुडल्या कांय म्हयन्यांत विधानसभा वेंचणूक आसा हें सत्ताधारी पक्षान लक्षांत दवरचें पडटलें. आमी नव्या गजालीं आड नात. पूण ही प्रक्रिया पारदर्शक आसपाक जाय, अशें तांणी सांगलें.
सगळे नेम पाळ्ळ्यात: स्टीफन फर्नांडीस
स्मार्ट मिटर निविदा प्रक्रियेंत सगळे नेम पाळ्ळ्यात. प्रत्यक्ष काम सुरू करपाक चार वर्सां लागलीं म्हणून मिटराच्या वेगवेगळ्या भागांचें दर वाडिल्लें. हाका लागून अदमास खर्चा परस चड खर्चा खातीर निविदा जारी जाली. हाका केंद्रीय नोडल एजन्सी कडल्यान मान्यताय मेळ्ळ्या. गोंयच्या लोकांक बर्या दर्जाचे स्मार्ट मिटर दिवप हो आमचो हेत आसा, जाचो फायदो गिरायकांक जातलो, अशें स्टीफन फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
