भांगरभूंय | प्रतिनिधी
नवी दिल्लीः आंतरराष्ट्रीय बाजारांत कच्च्या तेलाचें दर वाडत आसा. मध्य उदेंतांतल्या संघर्शाक लागून देशभरांत पेत्रोल आनी डिझेलाचें दर परतून वाडलें. पेत्रोल आनी डिझेलाचें दर लिटराक २.६० रुपया आनी दर लिटराक २.७० रुपया वाडल्यात. फाटल्या धा दिसांत इंधनाचें दर वाडपाची ही चवथी फावट आशिल्ल्यान ह्या काळांत पेत्रोल आनी डिझेलाचें दर सुमार ८ रुपयांनी वाडलां.
वाड जाले उपरांत राजधानी दिल्लींत पेत्रोलाचें दर लिटराक १०२.१२ रुपया जाल्यार डिझेलाचें दर ९५.२० रुपया जालां. मुंबय, कोलकाता, बेंगळुरू, चेन्नय सयत जायत्या महानगरांनी पेत्रोलाचें दर ११४ रुपयां कडेन वचत आसा. हातूंत सामान्य नागरिकाच्या बोल्साक बरोच खार पडला.
मध्य उदेंतांतल्या ताणाक लागून संवसारीक बाजारांत कच्च्या तेलाचें दर सेगीत वाडत आशिल्ल्यान सरकारी तेल कंपनींचेर अर्थीक चेंपण वाडलां. सरकारी तेल विपणन कंपनींक दिसाक सुमार १६००-१७०० कोटी रुपयांचें लुकसाण जावपाक लागलां अशी म्हायती मेळ्ळ्या. फाटल्या धा सप्तकांत हें लुकसाण एक लाख कोटी रुपयां परस चड जालां अशें म्हणटात.
दर वाडिल्ल्यान येरादारी, माल येरादारी आनी दिसपट्ट्या गरजेच्या वस्तूंच्या दरांचेर परिणाम जावपाची शक्यताय आसा; म्हारगायेचें चेंपण आनीक वाडपाचो भंय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
