भांगरभूंय | प्रतिनिधी
पणजी : पयली ते आठवी मेरेनच्या शिक्षकां खातीर आतां नोकरेंत दाखल जातना शिक्षक पात्रताय चांचणी (टीचर्स इलिजीबीलिटी टॅस्ट) परिक्षा उत्तीर्ण जावपाची सक्ती आसा. हे विशीचें परिपत्रक शिक्षण खात्यान जारी केलां.
आदले प्रमाण डीएड वा बीएड करचेच पडटले. तशेंच शिक्षक पात्रताय चांचणी उत्तीर्ण जावची पडटली. राज्य शिक्षण संशोधन आनी प्रशिक्षण मंडळ ही परीक्षा वर्सांतल्यान दोन खेपे घेता. पात्रताय चांचणी परीक्षा उत्तीर्ण जाले खेरीत शिक्षक पदा खातीर उमेदवार पात्र थारचे नात. केंद्रीय पांवड्यार ‘एनसीईआरटी’ शिक्षक पात्रताय परिक्षा आयोजीत करतात. केंद्रीय पांवड्या वयली परिक्षा लेगीत गोंयच्या विद्यार्थ्यांनी दिवपाक हरकत ना, अशी म्हायती शिक्षण संचालक शैलेश झिंगडे हांणी दिली.
गोंय शिक्षण कायदो 1986च्या नेम 78 प्रमाण मान्यताप्राप्त शाळां खातीर शिक्षक भरती नेम निश्चीत जातात. शिक्षण हक्क कायदो 2009 प्रमाण राष्ट्रीय शिक्षण शिक्षक मंडळाचे भरती नेम सगळ्यांक लागू जातात. एनसीटीई च्या मार्गदर्शक तत्वां प्रमाण आता शिक्षकां खातीर शिक्षक पात्रताय चांचणी उत्तीर्ण जावप सक्तीचें आसा, अशें परिपत्रकांत स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
