ज्ञान भूंय

भांगरभूंय | प्रतिनिधी

राॅटविलर सुणो

राॅटवेलर, राॅटविलर ही सुण्यांची खूब आदली जात. तांचे 99 टक्के डीएनए हे लांडग्याचे आसतात, अशें कांय जाणकारांचें मत. रोमन साम्राज्याच्या काळांत राॅटविलर आशिल्ले. कांय सुणे राॅटविलर गांवांत आयले आनी थळाव्या सुण्यां कडेन संकर जावन सध्याची जात जल्माक आयली. ह्या गांवां वयल्यान तांकां राॅटविलर म्हणटात. गोरवां, मेंढरां राखप आनी ल्हान गाडये वयल्यान मांस बाजारांत व्हरप इतलेंच तांचें काम. जर्मनींत ताका रोटवेल खाटकांचो (कसाई) सुणो, अशा अर्थाचें नांव आसा. आतां हे सुणे सोद आनी सैमिक संकश्टा वेळार मजत करपा खातीर पुलीस वापरतात. घर राखपाकूय ते पोसतात.
राॅटविलर हो पीटबूल उपरांतचो नंबर 2 चो खतरनाक सुणो. पूण मायेन वागयत, प्रशिक्षण दित जाल्यार तो सहसा कोणाचे वाटेक वचना. खास करून अमेरिकन राॅटविलर. ह्या सुण्यांच्यो साबार जाती आसात. रोमन, जर्मन आनी अमेरिकन राॅटविलर जाती सगल्यांत लोकप्रीय. रोमन जातीचो राॅटविलर मास्टिफ सुण्यां सारको आनी आकारान व्हडलो आसता. ह्या सुण्यांचे पेटे 10 ते 40 हजार रुपयांक मेळटात. मात घर राखपाक आनी सर्तींनी वांटो घेवपाक जाय तसल्या पेट्यां खातीर 40 हजार ते 2 लाखां मेरेन मोडचे पडटात.

राॅटविलर सुणो बुद्धीमान. शांत आसता. मालक आनी ताचे घरचीं म्हणल्यार ताचे खातीर देव. हे सुणे मुद्दाम कोणा कडेन झगडीं करपाक वच्चे नात. मात तकली घुंवली जाल्यार ते धनयांक पसून चाबतात. पानीपत गांवांत एकल्यान आपली जतनाय घेवपी मनशाकूच मारिल्लो. सुण्यांच्या दोतोराच्या मतान, तिडक आयल्यार राॅटविलर कोणाचेरुय हल्लो करूं शकता. मागीर तो मनीस काय वाग हें पसून तो चिंतीना!! रोमन साम्राज्यांतल्या ड्रोव्हर सुण्याची ही जात, अशेंय म्हणटात. ते कळपांनी रावपी. बुद्दीन हुशार. मात, शिरफाल्त आशिल्ल्यान ते केन्ना आक्रमक जायत तें सांगपाक येना. युरोप, अमेरिकेंत जायत्या वाठारांनी ते घरांत पाळपाक बंदी घाल्या. मात भारतांत बंदी ना.
आमच्या गोंयांतूय जायत्या लोकांनी ते पोसल्यात. मात ते अजून माणसाळचे, हे खातीर जाणकारांनी यत्न करपाक जाय. ह्या सुण्यांचो गोंयांत आंकडो कितलो तेंय पळोवपाक जाय. हाचे मुखार संकरीत सुणीं पोसपाक पंचायत, पालिकेन लायसन्स दिवचें, असोय एक विचार मुखार येता.

• डी. महेश